amalinks wokungena

Ingcwethi Zomnotho Zithi Akusetshenziswe iRand Kuphela eZimbabwe

  • Mavis Gama

Ingcwethi kwezomnotho sezikhuthaze uhulumende ukuba avumele ngokushesha, ukusetshenziswa kwemali yakwele South Africa, eyeRand ngokusemthethweni njengoba kuvele kuyilona lizwe elihlezi lithengiselana impahla enengi lele Zimbabwe.

Zithi iRand lisebenza okwedlula idola leMelika eliyilo elisetshenziswa kakhulu eZimbabwe.

Lokhu ngokunye kokuphume emhlanganweni wokukhulumisana ngezesimo somnotho lokuba sibaphatha kanjani abesifazane, obizwe ngabenhlanganiso yomanyano wenhlanganiso ezilwela amalungelo abesifazane, owe Women’s Coalition in Zimbabwe, oqhutshwe ngendikimba ethi “ Women unmasking the Zimbabwe Economy ”.

Eyinye yalezingcwethi kwezomnotho engumcebisi njalo kahulumende kwezokuthuthukiswa kwawo, uProffessor Ashok Shakravarti, uthe okunye okungenziwa nguhulumende yikubuyisela imali yeZimbabwe lanxa kusobala ukuba kuzoba nzima ukuthi uzulu akwamukele yena sewalahla ithemba ngemva kwezehlakalo ake ahalangana lazo eminyakeni yangemuva.

Uthe lanxa eseleminyaka eyisitshiyagalolunye ezama ukumcebisa uhulumende ukuba avumele ukusetshenziswa kwemali yakwele South Africa, eye Rand, akayikulahla imbeleko.

UShakravarti ngomunye wababephikisana lombono wokusetshenziswa kwe Bond kusukela ekuqaleni.

UNkosazana Naume Chakanya, ingcwethi yezenotho, ephatheke emisebenzini yokucubungula ngawo phansi kwenhlanganiso yeLabour and Economic Development Research Institute of Zimbabwe, uthe uhulumende kumele adinge indlela ebalulekileyo yokusetshenziswa kwemali elizweni.

Omunye wabekade bekulomhlangano, nguNkosikazi Audrey Charamba, ingcwethi kwezokukhulumisana, ukulinganiswa kwamathuba phakathi kwabesilisa labesifazane kanye lentuthuko enhlanganisweni ye WOMENSPACE, osekele umbono walezingcwethi.

Lanxa ukulethwa kwemali yeZimbabwe, kulinyathelo elihle, uCharamba uthe kodwa uzulu sekukade walahla ithemba ngalohulumende, kuzothatha isikhathi ukwamukeleka kwalo.

Ingcwethi zithi kunje kudingakala imali phose ibhiliyoni linye lamadola eMelika, ebhoda ezandleni zabantu elizweni, ukuze sizinze lesi simo ilizwe elikiso.

Zithe le eyizigidi ezingamakhulu amathathu ebhodayo okwamanje, kayeneli njalo seyehla kakhulu isukela kwezingamakhulu ayisithupha ngomnyaka ka2009.

Facebook Forum

XS
SM
MD
LG