Izakhamizi zemaphandleni kazivunanga lonyaka ngenxa yokungani kuhle kwezulu osekutshiye inengi libhekane lendlala enkulu kakhulu.
UNkosikazi Juliet Nkiwane yisakhamuzi seSitezi njalo nguMqondisi wenhlanganiso yeWomen Development Association of Zimbabwe. Uthi isimo sibi kakhulu emaphandleni.
Izifuyo ezibalisa inkomo lazo zisengozini yokucuba ngoba asetshabalala amadlelo kukanti udubo lwamanzi seluqalile ngoba amadamu asesitsha okuzadala ukulahlekelwa kwezakhamizi, kutsho uMaNkiwane.
ENyandeni lakho babhekane lodubo olufanayo. UMnu Dennis Moyo uthi basebunzimeni obukhulu lonyaka ngenxa yendlala.
UMoyo uphinde wachothoza labo abahlukuluza induna yeNtabazinduna uMnu. Felix Nhlanhlayamangwe Ndiweni esithi inkokheli zomdabu kumele zihlonitshwe.
Utsho lamazwi ngesikhathi abatsha bebandla leZanu PF eMatabeleland North sebethe uMnu. Ndiweni kumele asuswe esihlalweni kulandela inkulumo yakhe lapho abikwa ethe amazwe aphetsheya kumele engezelele izijeziso zomnotho azethesa eleZimbabwe ngoba uhulumende kaMongameli Mnangagwa esephula amalungelo oluntu.
Kusenjalo iqula ledale lephalamende elibona ngokuvikela ukwephulwa kwamalungelo oluntu livakatshele enkambeni yamapholisa eGwanda ngoLwesihlanu ukuzohlola ukuthi izibotshwa ezivalelwe ezitokisini ziphathwa njani.
Likomidi iveze ukukhathazeka ngokuswelakala kwengubo kulinkamba njalo imangele ithola kuvalelwe isibotshwa esisodwa nje.
Omkhulu wamapholisa eZansi yemaNdebeleni uCommisioner Patson Nyabadza ubike ngoLwesithathu ePlumtree ukuthi inani lamacala adalwe lonyaka kusukela ngoZibandlela liqongile ngesilinganiso sokulitshumi lanhlanu ekhulwini 15% njalo lawamacala abalisa awokubulala lokudlwengulwa kwabantwana.
