amalinks wokungena

Breaking News

Indlala Ilokhu Ibhahile Elizweni


Izakhamizi ziphiwa uncedo lokudla nguhulumende kanye lenhlanganiso yeWorld Food Programme kodwa lokhu ukudla kutholwa ngabagugileyo kanye labaswelayo kuphela okudala ukuthi inengi lihlaselwe yindlala.

Izakhamizi zemaphandleni zithi indlala ilokhu isabalala njalo ziyaludinga uncedo lokudla. Lanxa inhlanganiso ye World Food Programme iqalise kulinyanga ukuncedisa izakhamizi ngokudla inengi lithi alikutholi lokhu Ukudla.

Izakhamizi ziphiwa uncedo lokudla nguhulumende kanye lenhlanganiso yeWorld Food Programme kodwa lokhu ukudla kutholwa ngabagugileyo kanye labaswelayo kuphela okudala ukuthi inengi lihlaselwe yindlala.

UNkosikazi Mthethephi Mnkandla oyisakhamuzi seMawane eGwanda uthi ukungani kuhle kwezulu kanye lokukhuphuka kwentengo yempuphu ezitolo sekutshiye inengi libhekane lendlala embi kakhulu.

Amazwi akhe asekelwe ngesinye njalo isakhamuzi seMawane uMnu. Gibson Sibanda othi abenelisa ukuncedisa kufanele bephathise abanye ngokudla.

UMnu Gabriel Moyo uthi intengo yempahla ezitolo ikhuphuke kakhulu osekutshiye inengi lezakhamizi lingazi ukuthi libambe ngaphi ukuze liziphilise.

UKhansila weNtepe uMnu. Miclas Ndlovu uthi indlala ilokhu ibhahile esigabeni sakhe njalo kuyadingeka ukuthi ezinye inhlanganiso lazo zingenele zincedisane lezi ezikhona ukuze uzulu engahlaselwa yindlala.

Inhlanganiso yeWorld Food Programme ithi abantu beZimbabwe abafika phose izigidi eziyisithiyangalombili 7, 7 million badinga uncedo lokudla. Okwamanje linhlangansio incedisa inani labantu eledlula izigidi ezintathu ngokudla elizweni lonke jikelele.

Kusenjalo, kolunye udaba izakhamizi zeGwanda sezichothoze inyathelo elithethwe luhlangothi lwamanzi olweZimbabwe National Water Authority Zinwa elokuhluthunela umanisipala walelidolobho izimota ngenxa yesikwelede.

Isikhonzi somthethwandaba waphezulu sathatha izimota ezifika phose itshumi ezigoqela ezokuthwala abagulayo lezokucitsha umlilo ngenxa yesikwelede samanzi osekutshiye izakhamizi zisengozini.

UNobhala jikelele wenhlanganiso yezakhamizi zeGwanda uMnu Bekezela Maduma Fuzwayo uthi lokhu akulunganga.

UMeya wedolobho leGwanda uMnu Jastone Mazhale uthi isikwelede lesi sesileminyaka kodwa baphakathi kokukhulumisana leZINWA ukuze baxazulule loludaba.

Isikhulumeli seZINWA uNkosikazi Majorie Manyongwa uthi udaba lweGwanda lusezandleni zeziphathamandla zogatsha olubona ngezokulima esingenelisanga ukuxoxa lazo.

Okwamanje umanisipala uthenga amanzi eZINWA abesethengisela izakhamizi osekudale ukuthi umthelo wamanzi kulelidolobho ubephezulu kulamanye amadolobho.

please wait

No media source currently available

0:00 0:05:23 0:00


Facebook Forum

XS
SM
MD
LG