Umphathintambo wezemali uthi kumaviki ambalwa alandelayo uzahlala phansi lekhansili yenkokheli zomdabu bavumelane ngesilinganiso sokungezelela inani lemali abayithoka ngenyanga ukuze benelise ukuhlawulela indleko abahlangana lazo emsebenzini wabo.
Ekhuluma ngemva komhlangano wenkokheli zomdabu walonyaka koBulawayo eLarge City Hall, uMnu. Ignatius Chombo, uthe bayakubona ukuba imali ephiwa inkokheli zomdabu ayisahambelani lendleko abahlangana lazo ekusebenzeni kwabo ngakho bazathi behlale phansi batsho ukuthi ingengezwa ngesilinganiso esinganani ngoba amakhulu amathathu amadola abawatholayo okwamanje ayayangisa lokuwakhuluma.
UNduna uNdiweni uthe sebethenjiswe izimota kodwa abakatshelwa ukuthi ziza nini.
UNduna Nekatambeuthe kuyayangisa ukuthi akhulume ukuba baphiwa malini ethi loChombo laye utshilo ukuthi uyayangeka ukuyikhuluma.
Umongameli weZAPU, uMnu. Dumiso Dabengwa, uthe izimota lemali ezizaphwa inkokheli zomdabu akumangalisi ngoba kuyinjayelo ukuba ibandla elibusayo lithenge abantu uma kuyiwa ekhethweni.
Inkokheli zomdabu kunye lamakhosikazi labomnyeni babo bafike koBulawayo izolo baphakathi komhlangano okhangelele ukuphela ngeNsonto. ngoMgqibelo bakhangelele ukuhlangana loMongameli Robert Mugabe bexoxisana ngobukhokheli babo kunye lezinye indaba.
Ezinye inkokheli zomdabu sezisolwa nguzulu ngesizatho sokusebenzela ibandla elibusayo litshiya umsebenzi wayo womdabu. Umhlangano wenkokheli zomdabu uqhutshwa ngaphansi kwendikimba ethi “Promoting Traditional Leadership Practices that Safeguard Culture and Heritage for Sustainable Rural Development in Line with the Zim-Asset Blueprint.”