Lanxa umongameli Emmerson Mnangagwa esithi uhulumende uzaxotsha abasakhulayo abakubandla leZANU PF abaholiswa nguhulumende kodwa bengasebenzi, inengi lithi lizakholwa ngokubona ngoba abatsha laba sebeke bakhutshwa kodwa babuyiselwa njalo.
Umongameli Mnangagwa wethule amazwi la ngoLwesine emhlanganweni wedale lepolitburo yebandla lakhe leZANU PF.
Ukuhlaziya loludaba, uNtungamili Nkomo weStudio 7 uxoxe loMnu. Richard Mahomva, ingcwethi ecubungula ezomnotho welizwe, yena othi kusobala ukuthi umongameli Mnangagwa umadolonzima ekulungiseni okuhluphayo elizweni selokhu wathatha intambo zombuso ngakho izenzo yizo eziqakathekileyo okwedlula amazwi kuloludaba.