Ingcwethi ezicubungula ezombusazwe zithi kufanele uhulumende alungise udaba lwesisindo semali yeZimbabwe ukwenzela ukuthi inhlelo zakhe ziphumelele. Lokhu kulandela ukukhalala umsebenzi kwabasebenza kwezempilakahle, abathi bafuna uhulumende abengezelele iholo.
NgoLwesithathu, umphathintambo kahulumende obona ngenhlelo zemali uMnu. Mthuli Ncube uthe izisebenzi zikahulumende sezizaholiswa amadola eMelika ayisikhombisa lanhlanu 75 U.S Dollars, kuthi ababesebenza kuhulumende asebathatha umhlala-phansi baphiwe amadola angamatshumi amathathu; 30 U.S dollars, kathathu kusukela kuyonale inyanga kaNhlangula. Phezu kwalokhu, iholo labo lizakwengezelelwa ngesilinganiso sokungamatshumi amahlanu ekhulwini-50 percent.
UMnu. Ncube uthe inyathelo likahulumende leli ngelokuincedisa izisebenzi zakhe ngesikhathi lesi kulomkhuhlane weCOVID 19 elizweni lemhlabeni jikelele.
Ngalokho, uthe izisebenzi zikahulumende sokufanele zivule amabhuku lapho ezizaholela khona njalo zigcine imali yakwamanye amazwe awe Nostro Bank Accounts.
Wengeze wathi uhulumende uzaqhubeka ehlolisisa udaba lweholo lezisebenzi zakhe kanye lama allowances ukwenzela ukuziphathisa. Kodwa izisebenzi zithi azisuthiseki ngemali eziyithenjisiweyo, njalo intengo yempahla iphange yakhuphuka ngemva kombiko kahulumende.
Ukuhlaziya loludaba, asizweni umbono kaMnu. Bekezela Maduma Fuzwayo, ingcwethi ecubungula ezombusazwe.