Iqembu le Ngezi Platinum yilo elihlezi phezu kwengalane yemiklomelo lilemiklomelo engamatshumi ayisithupha lantathu okulinani elilingana leliphethwe liqembu elihlezi kundawo yesibili engalaneni ele FC Platinum kodwa ele Ngezi lihlezi phezulu ngoba lihlohle kanengi.
Kusele imidlalo emithathu ukuba imidlalo yesigaba se Castle Lager Premier Soccer League ifike emaphethelweni njalo kulamaqembu amane alethuba lokuphakamisa isicoco kodwa umqeqetshi weqembu le Ngezi Platinum Stars uTonderai Ndiraya utshele intathelizindaba ngemva komdlalo weqembu lakhe lele Bantu Rovers wona ophele ele Ngezi linqobe nge 1 ka nya ukuba kusemandleni eqembu lakhe ukuphakamisa inkezo.
"Kusasemandleni ethu ukuphakamisa isicoco. Into okumele siyenze yikunqoba emidlalweni eseleyo sibe zintshantshu zalonyaka. Umbuzo usekuthini sizakwenelisa yini lokhu."
Emdlalweni walo olandelayo iqembu le Ngezi lizadlala lele Chicken Inn kuthi kolandelayo lizadlala lele FC Platinum okungamanye amaqembu alamathuba okuphakamisa isicoco lonyaka okutsho ukuba nxa lingawanqoba liyabe selizifake esimeni esihle kumkhankaso walo owokuba zintshantshu zalonyaka.
Emdlalweni walo wokucina iqembu le Ngezi lizadibana lele Triangle.
Ngaphansi kwengalane impi yokusinda ekugunyulweni kusigaba saphezulu iqhubekela phambili njalo amaqembu abalisa ele Shabanie Mine lele Hwange alokhu elethemba elokusila ngesikhala senalithi ikanti iqembu le Tsholotsho lele Bantu Rovers yiwo asephelelwe ngumphako.
Iqembu le Hwange lithuthukise amathuba alo awokusinda ekugunyulweni ngokubhaxabula ele Highlanders nge 3 ka nya ngeSonto.
Manengi amanye amaqembu asengozini eyokuphuma kodwa asesimeni esibi ngabalisa ele Bulawayo City, ele Harare City, ele Yadah kanye lele Black Rhinos.
