amalinks wokungena

Breaking News

Ingcwethi Zenotho: Akula Nguquko Kwezenotho Ekhangelelwe ngo2016 eZimbabwe


Ingcwethi ecubungula ezenotho uMnu. Masimba Kuchera

Ingcitshi zezenotho zithi akukho okunengi okungakhangelelwa nguzulu kwezokuthuthuka komnotho ngendlela izinto ezimi ngayo eZimbabwe okungaphathisa abantu makhaza singena kunyaka omutsha ka2016 kukhangelwa inkinga ilizwe elibhekana lazo okwamanje.

Ingcwethi ecubungula umnumzana Masimba Kuchera uthi noma ibandla leZanu PF lomongameli Robert Mugabe bethembisa abantu ukuba izinto zizakuba ngcono kumnyaka esingena kiwo singagijimeli ukukhangelela okunengi:

Unkosikazi Lorraine Sibanda owenhlanganiso yabaphila ngokuthengisa uthi umumo wezinto usufuna ukuba uhulumende elungisise ikakhulu indlela asebenza ngayo leziqondiso zakhe ukuze enelise ukuvuselela amabhizimusi abantu bathole imisebenzi kulokubeka izithembiso impumela ingakhanyi.

UKuchera uqhubeka ethi esingathembela kukho yikuba ilizwe lithole usizo. Uthi okudubayo yikuba sokusuke kwaba lokungazwani phakathi kwebandla elibusayo engaba yiyo inking a engaphinda ibangele ukuphuza kukuthuthukiswa kwezomnotho welizwe kunyaka ozayo ngokusilela kokuthembeka.

Uhulumende ubikwa lokhe elodubo lokungatholi imithelo enelayo kumabhizimusi okuyikho okumenza ahlale esehluleka ukubhadala iholo lezisebenzi zakhe ngesikhathi njengalokho okwenzakalayo okwamanje. Kudingakala ukuba kulungisiswe izinto ezinhlanu ezithi ukutholakala kuka getsi, ukutholakala kwamanzi, ukuvuselelwa kwezokulima, ukulungisiswa kwemigwaqo lenjanji, kunye lokukwehliswa kwenani lezisebenzi zikahulumende.

I-Zimbabwe ibhalelane izivumelwano leChina zokuphathisa intuthuko yelizwe lonyaka u mongameli Mugabe ethembisa ukuba izinto zingaba ngcono ngomnyaka esikhangelane loluwungusungula liviki.

Kodwa uzulu uthi lokhe engakaboni lutho olukhomba intuthuko ngaphandle kokuthwala gadalala empilweni.

XS
SM
MD
LG