amalinks wokungena

Breaking News

Inhlanganiso YabeZimbabwe Abahlala eBotswana Ikhuthaza Ukulondolozwa Kwamasiko esiNdebele


AbesiNdebele kwele Botswana

Inhlanganiso yezizalwane zeZimbabwe ebona ngokulondolozwa kwamasiko abaphuma emhlubulweni weMaNdebeleni eziseBotswana, eyeSibanye, ithi isibone kufanele ukuthi ingene kwezamabhizimusi, ikhangele kakhulu amathuba angavuka endaweni ezisemhlubulweni lapho abadabuka khona.

Inhlanganiso yeSibanye Cultural Group, eyabunjwa ngomnyaka ka 2015, ikhangele kakhulu ngokulondolozwa kwesiko kanye lolimi lwesintu kwabeZimbabwe abahlala kweleBotswana.

Kodwa kuphume mgceke emhlangwanweni walenhlanganiso owenzele eGaborone ngeSonto, ukuthi iSibanye isikhangele ukuthi ingene kwezebhizimusi.

Lokhu kulandela uhambo luka mongameli Emmerson Mnangagwa yena owayevakatshele eGaborone ngeviki edluleyo, lapho akhuthaza abeZimbabwe ukuthi basebenzise amathuba azavuleka kwezomnotho.

Umgcinisihlalo weSibanye, umnunzana Cephas Tshuma uthi kwaphuma mgceke ngesikhathi bekhuluma lomongameli Mnangagwa, ukuthi kungavuleka amathuba,ikakhulu emangweni weMaNdebeleni okumele asetshenziswe.

UTshuma ukhuthaze abantu besintwini ukuthi bayakele ukukhangela zonke indaba ngelihlo lezombusazwe, lapho abakhala ngoncindezelo, kodwa labo bangene kwezamabhizimusi…

Okwakhathesi, uMnangagwa ubike ukuthi kuzavuleka amathuba ikakhulu kumakampani adonsa ngefarisi afana leka loliwe, eyeNational Railways of Zimbabwe, eye Cold Storage Commission kanye le Dunlop, zona ezazingomaqhuzu kumabhizimusi azo isimo somnotho singakaqali ukubhidlika.

UTshuma uthi abantu abaphuma kwezinye izigaba ezingaphandle kweMaNdebeleni, abadondi ukuphuthuma amathuba ezebhizimusi…

Abanye abeZimbabwe kweleBotswana, abafana lomnunzana Dumi Ncube bathi linyathela elihle ukuthi inhlanganiso eziphuma kweleMaNdebeleni, zilwele ukungena kunhlangothi ezitshiyeneyo zomnotho, ukuze kunikeze abantwana besigaba amandla kumathuba emsebenzi…

ISibanye njalo ikhuthaze amalunga ukuthi aqale amabhizimusi noma kweleBotswana, azathola usekelo kwabanye babo.

Kuzasungulwa njalo uhlelo lokuncedisa amalunga ngesikhathi semfa, kukhangelelwe ukuthi amalunga aqhubeke ekhipha imali ngenyanga ukuze kuthuthukiswe isikhwama.

Eminyakeni edluleyo, inhlanganiso le inanze imisebenzi elehlonzi ethe yezinwa ngabantwana abaphuma eMaNdebeleni abagoqela ingcwethi yezembali, umnunzana Phathisa Nyathi abadume kwezenguqu abafana loMadinda Ndlovu, Peter Nkomo kanye loBarry Daka.

Umcimbi walonyaka, ovame ukubakhona ekupheleni komnyaka ukhangelelwe ukubiza imali engangamapula ayinkulungwane ezingamatshumi ayisikhombisa (P70,000).

please wait

No media source currently available

0:00 0:03:23 0:00

Facebook Forum

XS
SM
MD
LG