amalinks wokungena

Breaking News

Abazali Labantwana Batshengisela Besola Inhlawulo Yemihloliso kaGrade 7


Ukutshengisela kwabantu besola imbadalo yokuloba imihloliso

Abazali labantwana besikolo esibangeni sePrimary, bafole ezitaladeni zeHarare betshengisela ukukhonona kwabo phezu kwenyathelo lokuhlawulisa abenza izifundo zikaGrade Seven, imali zemihloliso kanye lokungezelelwa kwemali zemihloliso kaform 4, besithi bafuna kokubili kwesulwe.

Abazali labantwana befole edolobheni leHarare ekutshengiseleni okuqoqwe ngabenhlanganiso ebona ngokulondolozwa kwamalungelo kazulu eye Zimbabwe Human Rights Association.

Umnumzana Sipho Makore wasemzini weSt Marys eChitungwiza, ngumzali wengane ezimbili, ezithatha izifundo zika Form Two loGrade Seven. Akasebenzi uMakore, uphila ngokuthengisa ethi lokho osekukhulunywa ngabezemfundo kuzengezelela ubunzima yena labanye abanjengaye ababhakane lalo.

UMakore uthi yilesi simo esimenze waphatheka labanye kulokhu kufola, esephelelwe.

Unkosazana Nancy Madzivire ongumcebisi kwezemithetho enhlanganisweni ye ZIMRIGHTS uthi benhlanganiso yakhe belisola lelinyathelo likahulumende kundaba eziphathele lezemfundo.

Umphathintambo wogatsha lwezemfundo yePrimary uDr Lazarus Dokora, walile ukutsho icele lakhe ngesikhathi kukhulunywa laye ecingweni, wathi kumele kutholwe impendulo kulowo ophethe uhlangothi lwezokukhulumisana.

Kunyanga ezisanda kwedlula, UDokora utshele uzulu ukuba ugatsha lwakhe seluzahlawulisa abantwana ababhala imihloliso ka Grade Seven amadola amathathu kusifundo ngasinye.

Wathi lenhlawulo yemihloliso yezimfundo zika form four, izakhuphuka isuka kwelitshumi lantathu isiya kwelitshumi lanhlanu-$13 to $15 esifundweni ngasinye.

Lokhu ngokwakuqala embalini yelizwe, ukuhlawulisa ukubhala imihloliso ka Grade Seven.

Abazali bathi inyathelo elifuna ukuthathwa nguhulumende, lizabangela ukuthi inengi lalababantwana, lehluleke ukuqhubeka ngemfundo yesecondary ngoba bengalobanga imihloliso ka Grade 7 beswele inhlawulo yemihloliso.

XS
SM
MD
LG