Idolobho lakoBulawayo liqhubeka likhokhela ngenani lababulawa ngumkhuhlane weCovid-19 kulezinsuku kulandela ukubhubha kwabantu ababili balelodolobho izolo. Phakathi kwabalitshumi lanhlanu ababanjwe lumkhuhlane izolo, elizweni jikelele, abalitshumi lanye ngabakoBulawayo. Sebezinkulungwane ezedlula eziyisitshiyangalombili, 8389 asebefunyenwe belegcikwane leli eZimbabwe lokhu laqhamukayo.
Abongi bezibhedlela zikahulumende koBulawayo, sebemisiwe umsebenzi ngemva kokwala ukusebenza okwensuku ezinhlanu ngeviki besithi iholo labo aleneli ukuthi bahambe insuku ezedlula ezimbili abazisebenzayo.
Inhlanganiso emela abeZimbabwe kweleSouth Africa eyeZimbabwe Community in South Africa isisole abalwa impi yenkululeko kweleSouth Africa ngemva kokutshengisela kwabo edolobheni leDurban izolo begqekeza izotolo zabantu bokuza besithi ababuyele emazweni abo ngoba abasabafuni kweleSouth Africa.
Ukubalwa kwamavoti kweleMelika kuqhubekela phambili, kukhetho lokudinga umongameli olugqitshwe izolo. Ommela ibandla lamaDemocrats kulolu khetho lokhu esakhokhela ngemiklomelo yamaElectoral College Votes nxa kuqathaniswa loMongameli Donald Trump webandla lamaRepublicans.
Umqeqetshi weqembu labesilisa elimela ilizwe emdlalweni wenguqu elama Warriors, uZdravko Logarusic uthi akulabantu abamtshela ukuba abize baphi abadlali njengalokhu okucatshangelwa ngabanye abalandeli bomdlalo wenguqu.
Ku Livetalk namhlanje sikhangela okwenzakala eZimbabwe kanye lokhetho lweleMelika.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.