Abogatsha lwezempilakahle babika ukuthi sebeyizigidi ezedlula ezintathu-3,393,972, asebehlatshiwe ijekiseni yokuzivikela kuCovid 19, okulinani eligoqela izigidi ezedlula ezimbili lengxenye-2,661,887 zabahlatshwe amajekiseni womabili, ifirst le second dose. Babikwa bezinkulungwane ezedlula kancane ikhulu-133,242 asebahlaselwa yicoronavirus lokhe lolubhubhane luqhamuke e Zimbabwe nyakenye okulinani eligoqela abasindayo abazinkulungwane ezedlula ezilikhulu-128,153, kwafa abazinkulungwane phose ezinhlanu-4,691.
Uhulumende uvuma ukuba luqhubeka lukhula udubo lwemikhuhlane yengqondo elizweni kuthi abohlangothi olwelapha imikhuhlane le eAnnex ngaphansi kwesibhedlela seParirenyatwa Group of Hospitals, baveza ukuba asebekunanzelele ngezehlakalo zabelatshwa imikhuhlane yengqondo, inengi lakhona kungokubangelwa yikuthatha okudakayo.
UDokotela Muriel Selma Fallala obedume kakhulu koBulawayo esazakala ngokusebenzela uzulu, ofele engozini yomgwaqo ngeviki edluleyo, unikwe inhlonipho yeqhawe lenkululeko yesizwe, iLiberation War Hero nguHulumende wase Zimbabwe. Umhlangano we Joint Cooperation Meeting phakathi kweleZimbabwe leleMozambique uqalisile namuhla eHarare lapho okuhlafunwa khona eziphathelane lokuthuthukisa umnotho wamazwe womabili.
KuLivetalk namuhla kuhlelo “Diaspora Forum” sikhangela okwenziwa yizizalwane zeZimbabwe esezihlala kwamanye amazwe.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318. Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke. Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.