Sebeyizigidi ezedlula ezintathu lengxenye-3,680,636, asebehlatshiwe ijekiseni yokuzivikela kuCovid 19. Laba bantu bagoqela abayizigidi phose ezintathu-2,752,352, asebehlatshwe amajekiseni womabili, njekokubika kwabogatsha lwezempilakahle. Kunje sebezinkulungwane ezedlula kancane ikhulu-133,674 asebahlaselwa yiCoronavirus lokhe lolubhubhane lwaqhamukayo eZimbabwe nyakenye okugoqela abasindayo abazinkulungwane ezedlula ezilikhulu-128,465, kwafa abazinkulungwane phose ezinhlanu-4,699.
Uhulumende uqinisa elokuthi uzakwanelisa ukulifikisa inani elidingakalayo lesilinganiso sokungamatshumi ayisithupha ekhulwini - 60% loba izigidi ezilitshumi zabantu elizweni - 10million kusiyaphela inyanga kaMpalakazi kumnyaka ka 2021 ukuze ilizwe libe ngelivikelekileyo - i-herd immunity, njengokuthembisa kwakhe ekuqaleni kohlelo lokuhlatshwa kwabantu lelijekiseni lokuzivikela kumkhuhlane we COVID-19.
Umphathintambo wezemali uMnu Mthuli Ncube ngoLwesine ukhangelelwe ukwethula uluhlu lwemali ezasetshenziswa nguhulumende ngomnayaka ozayo, i-budget. Inengi lithi kumele uNcube eqakathekise inhlelo zokuthuthukisa uzulu, ikakhulu oswelayo.
Inhlanganiso ezilwela ukulondolozwa kwelungelo loluntu enhlangothini ezehlukeneyo zempilo zithukuthele ngemva kokumiswa kohlelo lokubhalisa ukuvota, ngabekomishini ebona ngezokhetho eye Zimbabwe Electoral Commission.
Inhlanganiso ebona ngokuhlanzeka lokulondolozwa kwemvelo eye EMA isiqale ukuthatha amanyathelo okumisa ukusetshenziswa kwamaphepha awePlastic kusiyafika uMpalakazi womnyaka ka2022. Bathi kumele ilizwe liqale ukusebenzisa amaphepha abolayo. Lokhu kwamukelwe ngabezitolo abanengi kuthi abanye bathi kumelwe I EMA iqakathekise imfundiso kazulu.
UBulawayo upha imibono eyehlukeneyo ngohlelo lokukhankasela ukubhalisela ukuvota, olwenziwa phansi kwesihloko esithi #EkhayaVote2023 ngesizatho sokuthi ngomnyaka ozayo sekuhlelwa izigaba zilakho ukwehla uma inani labantu ababhalisele ukuvota liphansi.
KuLivetalk namuhla kuhlelo “The Connection” sikhangela okwenziwa ngabatsha ukuzithuthukisa kunhlangothi ezehlukeneyo zempilo.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318. Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke. Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.