amalinks wokungena

Breaking News

Inhloko ZeNdaba Lwezi 25, 2020


Lokhu bedidekile abantu bakoBulawayo labemhlubulweni wonke weMandebeleni ngokuqansa kwenani lababulawa yiCovid 19, kanye labatholakale belegcikwane leli kumaviki amathathu edluleyo. Izolo kulomuntu oyedwa obulawe yileli gcikwane koBulawayo ngemva kokubhubha kwabane ngoMvulo.

Izifundi zekolitshini leUniversity of Zimbabwe ziyakhonona ngokukhwezwa kwembadalo yezifundo lezinye indleko kanye lokungatholiswa ubulembu be Internet ukuze bafunde bengekhaya ngesikhathi ilizwe lilwisana lo mkhuhlane we Covid-19.

Umkankaso wokukhuthaza ukungahlukumezani emulini owe16 Days of Activism against Gender Based Violence uyaqala namhlanje usiyagqitshwa mhlaka 10 Mpalakazi. Abenhlanganiso ezilwela amalungelo abesifazana koBulawayo, baqoqe imicimbi ehlukeneyo yokulimukisa lokufundisana lozulu ngokuqakatheka kokungatshotshozeli umumo wokuhlukumezana emulini ikakhulu ngokuphathelane lamalungelo abomama lamantombazana.

Inhlanganiso yeInternational Crisis Group (ICG) ithi udlakela solubhahile kakhulu emigodini yegolide eminengi eZimbabwe lapho otsheketsha asebetshona belwisana khona njalo becine bebulalana kwesinye isikhathi. Ngokunjalo, inhlanganiso le ithi uhulumende kumele athathe amanyathelo okuguqula umthetho weMines and Minerals Act ukuze kwenqatshelewe lokhu njalo akhuphule imali athenga ngayo igolide ukuze kwenqatshelwe ukukhitshwa kwalo ngudlu elizweni lisiyathengiswa kwamanye amazwe.

Izizalwane zeZimbabwe ezisebenza ezindlini kweleSouth Africa sezemukele ngezandla zombili isinqumo somthethwandaba wesisekelo sombuso sokuthi bonke abasebenza ezindlini abalimalela loba ukufela emsebenzini sebelelungelo lokufaka isicelo sokuhlawulwa yisikhwama sikahulumende esihlawula izisebenzi zonke ezifele loba ukulimalela emsebenzini.

UMnu. Joseph Biden, omelele ukugcotshwa ukuba ngumongameli kulandela ukhetho lukamongameli njalo osekhethe abanye abantu abazangena kudale leCabinet yakhe, uthi uzavuselela ilizwe leMelika okumele likhokhele kwezombusazwe, inotho lokunye. Wenza lokhu uMongameli Donald Trump esithi uqiliwe kukhetho olusanda kwenziwa.

Ku Livetalk namhlanje kuhlelo “Diaspora Forum” siqhubeka sikhangela ukuqonga kwenani lasebetholakala beleCovid 19 emhlabeni jikelele okugoqela eZimbabwe kanye lokwenzakala kweleMelika ngemva kokhetho lokudinga umongameli welizwe.

Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.

Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.

Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.

Facebook Forum

XS
SM
MD
LG