amalinks wokungena

Breaking News

Inhloko ZeNdaba Mabasa 06, 2021


Abogatsha lwezempilakahle babika ukuba sokulabantu abazinkulungwane ezedlula ezilikhulu- 123,454, asebehlatshiwe ijekiseni yeCOVID-19 Vaccine eZimbabwe, kusukela lolu hlelo luqalileyo ngoNhlolanja.

Kunje sebezinkulungwane eziphose zifike kumatshumi amane-36,934, asebefunyenwe beleCovid 19, lokhe leli gcikwane liqhamuke e Zimbabwe nyakenye ngoMbimbitho. Abazinkulungwane ezingamatshumi phose amathathu lanhlanu-34,758 babo, bengabagule basila kulumkhuhlane.

Izikolo ezimbalwa ezezinga eliphansi koBulawayo seziqale ukuphoqa abazali ukuthi bathenge ingwalo zokubala bethi le ngeminye imizamo kaHulumende eyokwehlisa ukumemetheka kweCOVID 19. Kodwa lokhu sekhudale ukukhonona ebazalini abathi imali yokuthenga ingwalo abalayo ngoba iholo liphansi njalo inengi belingasebenzi ngenxa yeLockdown.

Olwela amalungelo oluntu elilunga njalo leMDC Alliance, uMakomborero Haruzivishe ugwetshwe ngumthethwandaba kaMantshi, eHarare, ukuhlala ejele okwenyana ezilitshumi lane ngemva kokufunyanwa elecala lokutshotshozela udlakela.

Ukukhwezwa kwentengo yamafutha ezimota kwesatshelwa ukuthi kuzacobodisa amabhizimusi kade evele ecuba ngokuvalwa kwelizwe kade kusenzelwa ukuvimba ukumemetheka kwegcikwane le Covid 19.

Ku Livetalk namhlanje kuhlelo “The Connection” uMike Hove uxoxa labatsha ngohlelo lokuhlatshwa kwabantu ijekiseni lokuzivikela kuCovid 19, eleVaccine ukuze sizwe iibono yabatsha ngokuqhubeka kwalo eZimbabwe.

Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.

Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.

Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.

Facebook Forum

XS
SM
MD
LG