EZimbabwe sebefika inkulungwane eziphose zifike amakhulu amathathu- 280,568, asebehlatshiwe ijekiseni yokuzivikela ukubanjwa ngumkhuhlane eyeCOVID-19 Vaccine, lokhu lwasungulwayo lolu hlelo ngoNhlolanja, kubika abogatsha lwezempilakahle.
Inani lasebetholakale beleCovid 19 lokhu igcikwane leli laqhamukayo eZimbabwe nyakenye, sebezinkulungwane ezingamatshumi phose amane- 37,859. Okulinani eligoqela inkulungwane ezingamatshumi edlula amathathu lanhlanu- 35,031, labagule basila kulumkhuhlane, wabulala abedlula inkulungwane eyodwa lengxenye-1,553.
Abazali abalabantwana ezikolo zemaBoarding Schools bathi basevalweni olukhulu ngokuqansa kwenani labafundi abahlaselwe yiCOVID kodwa uhulumende uthi akukho okwethusayo ngoba beyenze yonke imizamo yokuvimba ukumemetheka komkhuhlane.
Kuhlandla lezenotho namuhla sikhangela ukuthi umnotho weZimbabwe umi ngaphi sokwedlule iminyaka engamatshumi amane lanye, 41, nje ilizwe lithole uzibuse. Abanye bathi inotho ihuquluzwa ngababusi kodwa bona bayakulandula lokhu.
Abenhlanganiso ezimela intathelizindaba bakhuthazwa ukuba badinge indlela ezilobuhlakaniphi ezingenza banelise ukusebenza ngokwesibanga esiphezulu ngalesi sikhathi lapho indlela zokukhulumisana ziguquka kokuphela ukuze baqhubeke belehlandla kuloluhlangothi lokusebenzisana lentathelizindaba.
Ku Livetalk namhlanje kuhlelo “The Connection” sikhangela ukuthi intuthuko yabasakhulayo baseZimbabwe iphazanyiswe okungakanani lubhubhane lweCovid 19.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.