Seliphezu kwenkulungwane ezingamakhulu amathathu-308,071, inani lasebehlatshiwe ijekiseni lokuzivikela kuCovid 19, ele Vaccine, kubika abogatsha lwezempilakahle. Lanxa leli nani lasebehlatshiwe liqonga okujabulisayo ingcwethi zezempilakahle zikhuthaza uzulu weZimbabwe ukuba aqhubeke ezivikela ukuthelelwa leli gcikwane.
Lamhlanje ikhansili yakoBulawayo ithole isipho samakhabothi okugcinela impahla yezigulane lezibane ezisebenzisa amandla elanga, aweSolar, esiqondiswe esibhedlela seThorngrove lapho ikhansili ebonge kakhulu umuli eziphe izipho kodwa bekhala ngokungasebenzi kahle kwendlu yokuphekela lokuwatshela izigulane.
Zisolwa kakubi iziphathamandla zihulumende ngendlela eziphathe ngayo ummeli wesigaba seHarare West edale lephalamende, uNkosazana Joanna Mamombe, ohluthunwe esibhedlela sePark Town ephakathi kokwelatshwa wathwalwa ngemota ebuyiselwa ejele lapho kade ekhona sonke lesi isikhathi. Lokhu kwenzakale lanxa udokotela wakhe exwayise lezi ziphathamandla ukuba udinga usizo lwengcwethi unkosazana Mamombe..
Kuhlelo Woza Friday namuhla sihamba lomculi womdumo oweHouse, uBiggie Dee Hero ephethe idlalade lakhe elitsha njalo lingelakuqala. UBiggie udabuka ePlumtree kodwa uhlabela eseSouth Africa.
Ku Livetalk namhlanje kuhlelo sikhangela ukuqhubeka kuhle kohlelo lweZimbabwe lokuhlaba abantu ijekiseni yokuzivikela kuCovid 19, eye Vaccine.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.