Asefikile eZimbabwe amajekiseni okuzivikela emkhuhlaneni, asweCovid 19 Vaccine, azinkulungwane ezingamakhulu edlula amathathu-344,000 avele kwelePeople’s Republic of China. Inkulungwane ezingamakhulu amabili ( 200 000 ) samajekiseni lawa aweCovid 19 Sinopharm Vaccine, yisipho esiphiwe ngabeChina, uhulumende yena uthenge inkulungwane ezedlula ikhulu-144,000.
Sokuhlatshwe abantu abazinkulungwane eziphose zifike amatshumi amane-37,660, ijekiseni yeCOVID-19 Sinopharm Vaccine eZimbabwe, kusukela ngenyanga edluleyo. Sebezinkulungwane ezedlula amatshumi amathathu asebebanjwe belecoronavirus kusukisela nyakenye leli gcikwane liqhamuka elizweni, labulala abedlula inkulungwane eyodwa lengxenye.
Izizalwane zeZimbabwe ezimbalwa esezithe zaphenduka ekhaya ngemva kokulahlekelwa yimisebenzi emazweni anjengele South Africa zithi impilo lokhu ilukhuni ngenxa yokuswelekala kwemisebenzi kanye lokuvalwa kwamakampani okwengezelelwe yikumemetheka kweCOVID-19.
Idale lephalamende seliqale uphenyo phezu kwemisebenzi yenkohlakalo ethi yabakhona ekuphiweni kwenkampani yeSakunda Holdings yekeIntratrek ukuthi zakhele iZesa izititshi zamandla kagetsi. Amankampani womabili abhadalwa izigidi zamadola kodwa kawenzanga lowosebenzi.
Amalunga ebandla leMthwakazi Republic Party abotshwe ngeviki edluleyo amiswe phambi komthethwandaba kamantshi namuhla koBulawayo ekhalaza ukukhulwa ngemali yesibambiso eyebail.
Silengxoxo loMfundisi Jester Sibanda webandla leBrethren in Christ Church emangweni weTshalimbe, ngodaba lweCoronavirus.
Ku Livetalk namhlanje kuhlelo lwabatsha olwe “The Connection” sikhangela ukuqhubeka kohlelo lweZimbabwe lokuhlaba abantu ijekiseni yokuzivikela emkhuhlaneni, eyeCovid 19 Vaccine.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.