Sokuhlatshwe abantu abazinkulungwane ezingamatshumi aphose afike ayisikhombisa-68,511, ijekiseni yeCOVID-19 Sinopharm Vaccine eZimbabwe, kusukela lolu hlelo luqalileyo ngenyanga edluleyo kaNhlolanja.
Namuhla uMongameli Emmerson Mnangagwa ukhangelelwe ukuhlangabeza amajekiseni okuzivikela kuCovid 19, avela kweleIndia, esilindweni sendizamtshina eseRG Mugabe International Airport, e Harare.
Abantu asebehlolwe batholakala beleCovid 19, eZimbabwe, sebezinkulungwane phose amatshumi amane-36,822, kusukisela nyakenye leli gcikwane liqhamuka elizweni. Abazinkulungwane ezedlula amatshumi amathathu lane-34,603 babo, kungabagule basila kulumkhuhlane. Abakhulelwe yilesi sifo bedlula inkulungwane eyodwa lengxenye-1,520.
Inhlanganiso ebona ngokudla emhlabeni jikelele eyeWorld Food Program ithi inani labantu abalambayo elizweni likhuphukile emadolobheni ngenxa yomkhuhlane weCOVID 19 lokuqonga kwentengo yempahla ezitolo.
Ingcwethi zezempilakahle zibika ukuba isilinganiso sokungamatshumi athoba minwemibili ekhulwini-80%, sabantu abaphila lezathuthwane i-Eplepsy, balakho ukuziphilela kuhle bengaphanjaniswa yiso nxa bengathola imfundiso lemithi kusese masinya.
Ku Livetalk namhlanje kuhlelo sikhangela ukuqhubeka kohlelo lokuhlaba abantu ijekiseni yokuzivikela ekubambeni umkhuhlane eyeCovid 19 Vaccine.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.