Kulabantu abaphezu kwamakhulu amathathu -335, abahlolwe izolo batholakala beleCovid 19, eZimbabwe, kwathi abayisikhombisa-7, babulawa yileli gcikwane.
Okwamanje ilizwe selenelise ukuhlaba abantu abedlula izigidi ezintathu-3,084,154, ijekiseni yokuzivikela kuCovid 19, kodwa abangaba yizigidi ezedlula kancane ezimbili babo- 2,271,135 yibo asebehlatshwe amajekiseni wonke womabili, kubika abogatsha lwezempilakahle.
lsiphinde yayekethiswa futhi imigoqo yokwenqabela iCoronavirus kweleSouth Africa okuyinto esiyemukelwe ngabantu abanengi ngenjabulo enkulu.
Isikolo seNkuba Primary School eNkayi sesisungule uhlelo lokufundisa abantwana kusetshenziswa imitshina yama computers, ama-radio sets lokunye. Uhlelo lolu olusekelwa yisizalwane seZimbabwe esiphandle kwelizwe, esingafisanga ukuvezwa igama, lukhangelelwe ukuba luzanceda ukuvimba ukumemetheka kwegciwane leCOVID-19. UMnu. Robert Ndlovu, okhangelane lokusungulwa kohlelo lolu eNkuba Primary School, uthi abantwana besikolo, ababalisi lezakhamizi bayaluthakazelela kakhulu uhlelo lolu.
Isiphathamandla sebandla leMthwakazi Republic Party uMnu. Parton Xaba umiswe phambi komthethwandaba kamantshi koBulawayo namuhla, esetheswa icala lokubangela udlakela njalo usecele imvumo yokukhululwa ngemali yesibambiso eye bail.
UMongameli Paul Kagame wakwele Rwanda uthi ufuna ukuthi ilizwe lakhe liqhatshe ababalisi abadabuka eZimbabwe.
Kuliviki kuhlelo Woza Friday silomculi wengoma zomdumo owe Hip Hop, uWarren Moyo odume ngegama lokuthi RockyDoub ecula eko Bulawayo.
Ku Livetalk namhlanje kuhlelo sikhangela isimo sokumelana leCvoid 19 eZimbabwe lokunye okwenzakala elizweni.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.