Ababalisi beZimbabwe bamanyana labamanye amazwe womhlaba, ukunanza usuku lokuqakathekisa umsebenzi wabo, eleWorld Teachers Day, ngesikhathi besithi bakhathazekile ngokungazihluphi kukahulumende ngendlela abasebenza ngayo kanye lesiphatho seziphathamandla zikahulumende.
Ele Zimbabwe selenelise ukuhlaba abantu abedlula izigidi ezintathu-3,117,895, ijekiseni yokuzivikela kuCovid 19, kodwa abangaba yizigidi ezedlula kancane ezimbili babo- 2,322,862 yibo asebehlatshwe amajekiseni wonke womabili, kubika abogatsha lwezempilakahle.
Owayengumsekeli kaMeya wakoBulawayo, uAlderman Amen Mpofu ubekwe namhlanje emathuneni aweLady Stanley. Inengi lincome imisebenzi yakhe lisithi wayengumkhokheli owayekhathalela uzulu wakoBulawayo lentuthuko yedolobho leli.
Udubo lwemali yamanye amazwe luqhubekela phambili ngesikhathi ibhanga lesizwe ele Reserve Bank of Zimbabwe lisithi umnotho welizwe uzakwehla kulalokho kade kucatshangelwa.
Iqembu labesifazane elimela ilizwe emdlalweni wenguqu lidlephana lele Botswana kumncintiswano we Cosafa Senior Women’s Championship kudingwa iqembu elizadlulela kusigaba esilandelayo esomncintiswano.
Ku Livetalk namhlanje kuhlelo “The Connection” sikhangela okwenziwa ngabasakhulayo base Zimbabwe, abaselizweni labaphandle kwelizwe.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.