Embikweni owethulwe ngabogatsha lwezemilakahle ekutshoneni kwelanga layizolo, sebezinkulungwane ezedlula eziyisitshiyagalombili-8,011, asebefunyenwe beleCovid 19, eZimbabwe, kwasinda abazinkulungwane ezedlula eziyisithupha lengxenye-6,504, labulala abedlula amakhulu amabili-230.
Amabandla ezombusazwe abalisa eleMDC Alliance lele MDC-T abe lokhetho lokudinga amalunga lwamaprimaries, ngempelaviki kuzixhenxe ezedlula ezilitshumi lanhlanu zalabo abakhutshiswe yiMDC-T ezikhundleni. Kwezinye izigaba kubikwa kuqhamuke udlakela.
Inhlanganiso emelana lokumemetheka kwegcikwane lengculaza eleHIV, bathi inani labantu ababanjwe ingculaza liyehla kusukela ngomnyaka ka2010 kusiya ku2019 kodwa bakhathazekile ngoba ngeke benelisa ukwehlisa njalo lelinani ngomnyaka ozayo kusiya ku2030 ngenxa yeCovid 19 esiphambanisa inhlelo zabo.
Ngesikhathi ingcwethi zezempilakahle, zihlolisisa okumayelana lamehlo lomthambo osekela ukubona owe Retina emzimbeni, odokotela bathi kuqakathekile ukuba abantu bazi ukuba inengi labo abacina befika esibangeni sokungaboni babengavimba ukuthi lokhu kwenzakale kumbe batholelwe indlela zokubatholisa uncedo lokwelatshwa ngokuhlinzwa kumbe bathole amangilazi.
Umqeqetshi weqembu lenguqu elimela ilizwe, elama Warriors uZdravko Logarusic uthi uyathokoza ngempumela eyomdlalo wobungane iqembu lesizwe eliwudlale lele Malawi ngeSonto.
Ku Livetalk namhlanje siqubekela phambili sikhangela umonakalo osudalwe yiCovid 19 eZimbabwe lasemhlabeni jikelele.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.