U-Bulawayo namhlanje ubhekane lodubo lokuswela izimotha lamabhasi athwala abantu ukungena lokuphuma enzikini yedolobho, kulandela ukukhalala umsebenzi okwenziwe ngabatshayeli bamabhasi kaZupco.
Ababalisi bakhuthazwa ukuba baqhubekele phambili besiya emsebenzini lobanje uhulumende esithi uzajezisa zonke izisebenzi kusukela namuhla ezingahlatshwanga ijekiseni yokuzivikela kuCOVID-19.
EleZimbabwe selenelise ukuhlaba abantu abedlula izigidi ezintathu-3,221,875, ijekiseni yokuzivikela kuCovid 19, kodwa abayizigidi phose ezimbili lengxenye babo- 2,479,178 yibo asebehlatshiwe amajekiseni wonke womabili.
Kunje inani lasebehlolwe batholakala bele COVID-19, eZimbabwe, lokhu lolubhubhane lwaqhamukayo ngoMbimbitho nyakenye, selikunkulungwane ezedlula ezilikhulu-132,368 okugoqela abantu asebephephe kulumkhuhlane sebezinkulungwane ezedlula ikhulu-126,308 kwafa inkulungwane ezedlula ezine lengxenye- 4,658.
Abakubandla leZanu PF bathi isithunywa esiqakathekileyo senhlanganiso yomanyano wamazwe womhlaba eseUnited Nations esethekelela eZimbabwe kumele sitshelwe ngabantu ukuba zibhidliza umnotho welizwe, izijeziso zenotho ezafakelwa inkokheli yebandla elibusayo. Kodwa amabandla aphikisayo athi iZanu PF yiyo ethwalise nzima uzulu.
Lizadlala lingekho ekhaya iqembu le Highlanders kusigaba esilandelayo esomncintiswano we Chibuku Super Cup ngemva kokugqiba imidlalo yalo lisendaweni yesibili kusibaya sika Group 2.
Ku Livetalk namhlanje sikhangela isimo sokumelana lobhubhane lweCovid eZimbabwe langohlelo lokuhlatshwa kwabantu ijekiseni yokuvikela lumkhuhlane.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.