EleZimbabwe selenelise ukuhlaba abantu abedlula izigidi ezintathu-3,228,506, ijekiseni yokuzivikela kuCovid 19, kodwa abayizigidi phose ezimbili lengxenye babo- 2,486,318 yibo asebehlatshiwe amajekiseni wonke womabili.
Kunje inani lasebehlolwe batholakala bele COVID-19, eZimbabwe, lokhu lolubhubhane lwaqhamukayo ngoMbimbitho nyakenye, selikunkulungwane ezedlula ezilikhulu-132,405 okugoqela abantu asebephephe kulumkhuhlane sebezinkulungwane ezedlula ikhulu-126,487 kwafa inkulungwane ezedlula ezine lengxenye- 4,659.
Intathelizindaba zivinjwa ukuthatha loba imifanekiso yesethekeli senhlanganiso yomhlaba wonke jikelele eyeUnited Nations, u-UNITED Nations (UN) Special Rapporteur, kalowo oselizweni, unkosikazi Alena Douhan okuleli ukuzazibonela umonakalo usuthe waba khona elizweni ngemva kokuba iziphathamandla zeZanu Pf ezikuhulumende zabekelwa izijeziso zomnotho.
Abenhlanganiso yabasakhulayo ye Youth Coalition on Elections baveza ukukhathazeka ngezehlakalo zodlakela phakathi kwamabandla aphikisanayo elizweni leZimbabwe okusobala ukuthi abamabandla ezombusazwe elizweni sebelungiselela lokhetho oluzayo lomnyaka ka 2023.
Izizalwane zeZimbabwe sezithe zaveza imibono yazo ehlukile ngendawo zokuvotela ezingamakhulu ayisithoba munwe munye 900 ahlelwe yikhomishini ebona ngezokhetho ezweni iZimbabwe Electoral Commission bethi lokhe embalwa njalo akude lozulu.
Kwezenotho namhlanje sixoxa labosomabhizimusi kanye labezombusazwe mayelana ngomthelela wezijeziso zenotho ezetheswa amalunga eZanu PF kumnotho weZimbabwe. Sikhuluma nje, kulesithunywa seUNited Nations esiselizweni esilande ukuzehlaziya ukuthi izijeziso lezi ziphazamisa njani uzulu.
Ku Livetalk namhlanje kuhlelo “The Connection” sixoxa labatsha ngenhlelo abazenzayo zentuthuko kanye lokutholiswa amathuba kwamantombazana ikakhulu abemaphandleni njengoba ngeviki edluleyo umhlaba ubunanza intuthuko yabesifazana bemaphandleni kusuku olwe International Day of Rural Women.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.