EleZimbabwe selenelise ukuhlaba abantu abedlula izigidi ezintathu-3,234,589, ijekiseni yokuzivikela kuCovid 19, kodwa abayizigidi phose ezimbili lengxenye babo- 2,493,994 yibo asebehlatshiwe amajekiseni wonke womabili.
Kunje inani lasebehlolwe batholakala bele COVID-19, eZimbabwe, lokhu lolubhubhane lwaqhamukayo ngoMbimbitho nyakenye, selikunkulungwane ezedlula ezilikhulu-132,437 okugoqela abantu asebephephe kulumkhuhlane sebezinkulungwane ezedlula ikhulu-126,621 kwafa inkulungwane ezedlula ezine lengxenye- 4,659.
Ibandla leMDC Alliance lithi umkhokheli walo labalandeli abambalwa bavinjwe namuhla ngabandeli beZanu PF ukuba bengene kwezinye indawo eMutare esabelweni seManicaland lapho obekumele bakhulume lenkokheli yomdabu labantu abatshiyeneyo ngokhetho oluzakwenziwa ngomnyaka ka2023.
Ikhomishini ebona ngokukhumisana umlotha, iNational Peace and Reconciliation Commission, ithi ayilamandla okuphenya udaba lokuntshontshwa kwelitshe lesikhumbuzo elafakelwa abantu ababulawa ngubhuqazwe weGukurahundi yinhlanganiso yeIbhetshu likaZulu eSilobela. Ngokunjalo, likhomishini ithi linhlanganiso kumele yazise amapholisa ngaloludaba.
Iqula leBotswana elicubungula ukuntshontshwa kwenkomo ezigabeni eziseduze lomngcele weZimbabwe, lisungule umsebenzi endaweni lezi ngeviki edluleyo. Kodwa eyinye inhlanganiso yabalimi kweleBotswana ithi kayilathemba lokuthi ikhomishini le izaqeda udubo lolu.
Luqalile uhlelo lokuhlaba ijekiseni eyeCovid 19 Vaccine yokuvikela ebantwaneni abaleminyaka ephakathi kwelitshumi lambili kusiya kwelitshumi lasikhombisa(12-17), kweleSouth Africa, okulinyathelo eselilethe impikiswano enkulu kubazali lengcitshi zezempilakahle.
Kwezemidlalo………Iqembu labesifazane elimela ilizwe le Zimbabwe emdlalweni wenguqu lingqikilana lelimela ilizwe le Eswatini kumncintiswano we 2022 Africa Women’s Cup of Nations.
Ku Livetalk namhlanje kuhlelo “Diaspora Forum” sikhangela okwenziwa ngabadabuka eZimbabwe asebehlala kwamanye amazwe.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.