Phakathi kwabantu abahlanu ababikwa bebulewe yiCovid 19 ngokutshona kwelanga layizolo, abathathu babo ngabakoBulawayo. Lokhu kukhuphule inani labantu asebebulewe yilumkhuhlane kwabangamakhulu edlula amabili-242. Sebezinkulungwane ezedlula ezithobaminwe mibili-8,303, asebetholakale belegcikwane leli elizweni.
Uzulu uthi ukubotshwa komkhokheli weZimbabwe Miners’ Federation uNkosazana Henrietta Rushwaya izolo ezama ukuphuma elizweni legolide elibiza imali engangeUS$366,000 kuveza sobala ukuthi umnotho welizwe uhuquluzwa ngabantu abasezikhundleni eziphezulu. Abanye bathi imisebenzi yenkohlakalo enje yiyo ebulala umnotho, hatshi izijeziso zenotho. Kodwa abanye bathi izijeziso lazo zilomthelela omubi.
Izakhamizi zeHwange eMatabeleland North zamukele ngemibono ehlukeneyo uhlelo lokulima lweIntwasa Gatshompo. Abanye sebeqalile ukuthola uncedo lwenhlanyelo lomvundiso lapho uMongameli Emmerson Mnangagwa achaze khona ukuba imuli ezifika phose izigidi ezimbili i1.8 million, zizasizakala phansi kwalolu hlelo.
Izizalwane zeZimbabwe esezihlala eMelika ezilelungelo lokuvota kukhetho lokudinga uMongameli elizweni leli, olwenziwa mhla ka3 Lwezi, zikhuthaza abantu bokuza ikakhulu abatsha ukuthi baphetheke kukhetho lolu ukuze imibono yabo izwakale kanye lokuthi inguquko abayifunayo ifezeke.
Inhlanganiso ecubungula ezokhetho eyeEdison Research and Catalist ithi sokulabantu abafika phose izigidi ezingamatshumi ayisithupha – 58,7 million asebevotile kukhetho lweMelika olwenziwa ngeviki ezayo mhlaka 3 ngoLwezi.
Ku Livetalk namhlanje kuhlelo lwabatsha olwe “The Connection” siqhubekela phambili sikhangela umonakalo osudalwe yiCovid 19 eZimbabwe lasemhlabeni jikelele kanye lokhetho lokudinga umongameli weMelika olwenziwa ngeviki ezayo mhla ka 3 Lwezi.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.