amalinks wokungena

Breaking News

Inhloko ZeNdaba Mfumfu 27, 2021


Isithunywa seUnited Nations uNkosikazi Alena Douhan namuhla ukhuthaze amazwe afana leMelika leBhilithani ukuthi esule izijeziso azethesa amalunga eZanu PF ngoba esithi zilimaza uzulu jikelele. Uphinde wakhuthaza njalo ukuthi kube lokukhulumisana kulungisiswe ezombusazwe njalo kuhlonitshwe amalungelo oluntu.

EZimbabwe inani lasebehlolwe batholakala bele COVID-19, lokhu lolubhubhane lwaqhamukayo ngoMbimbitho nyakenye, selikunkulungwane ezedlula ezilikhulu-132,724 okugoqela abantu asebephephe kulumkhuhlane abazinkulungwane ezedlula ikhulu-127,497, kwafa inkulungwane ezedlula ezine lengxenye- 4,674.

Abenelise ukuhlatshwa ijekiseni yokuzivikela kuCovid 19, bayedlula izigidi ezintathu-3,281,724, kodwa abayizigidi ezedlula ezimbili lengxenye babo- 2,556,721, yibo asebehlatshiwe amajekiseni wonke womabili.

UMnu. Kudzanai Mashumba, otshaywe ngabatsha abebandla leMDC-T, uthi usebophise abamtshaya ezama ukutshela intathelizindaba ukuba umkhokheli webandla leMDC-T, uMnu. Douglas Mwonzora, ucatshangelwa ukuthi watshontsha izigidi eziyisithupha zamadola eZimbabwe.

UMnu. Sybeth Musengezi, ofisa ukuba uMongameli Emmerson Mnangagwa asuswe esikhundleni sokhokhela ibandla leZanu PF, uthi ngamanga aluhlaza tshoko ukuba kayisilo lunga lebandla elibusayo.

Amalunga eMthwakazi Republic Party atshengisela emawofisini enhlanganiso yomhlaba wonke jikelele eyeUnited Nations kwele South Africa esithi uhulumende kaMongameli Emmerson Mnangagwa uqhubekela phambili encindezela uzulu..

Ugatsha lweZimbabwe National Statistics Agency (ZimStats) luthi intengo yezinto ezibalulekileyo empilweni kazulu ezifana lokudla, indleko yezempilakahle, eyemfundo, eyokuhlala lokunye, ikhwele ngesilinganiso sokwedlula okuyisithupha, 6.40, percent phakathi kwalinyanga lenyanga edluleyo.

hofisi yeZimbabwe kweleSouth Africa isungula uhlelo lokuvulela abantu abanengi abafuna ukuthola amaphasipoti lencwadi zokuzalwa.

KuLivetalk namuhla kuhlelo “Diaspora Forum” sikhangela okwenziwa ngabadabuka eZimbabwe asebehlala kwamanye amazwe.

Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318. Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke. Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.

XS
SM
MD
LG