Ikholitshi le National University Science and Technology elikoBulawayo, libikwa selimisa izifundo zokuya eclassini, ngakhokhe izifundi sokuzamele zenze izifundo zebulenjini ngenxa yokuqansa ngamandla kwenani labantu abatholakala beleCOVID-19, elizweni jikelele.
Inani labatholakala beleCOVID-19 ngokuphetha kosuku lwayizolo liqonge laya kwabangaphezu kwenkulungwane ezine-4,031, njalo yabulala abahlanu.
Ikhomishini ebiqhuba uphenyo phezu kodaba lokuntshontshwa kwenkomo emgceleni ophakathi kweZimbabwe leBotswana, isigqibe umsebenzi wayo, yanikeza ugwalo lwempumela kumongameli Mokgweetsi Masisi.
Abadabuka eZimbabwe abahlala kwele South Africa sebetshele umsekeli kamongameli welizwe leli ukuba kabasoze benelise ukuthola amaphepha amatsha okuhlala kulelolizwe kulandela umbiko owethulwe lidale labaphathintambo bakahulumende othi sokuzavalwa uhlelo olweSpecial Zimbabwean Exemption Permit.
Iqhubekela phambili imidlalo yenguqu kusigaba se Premier Soccer League namhla lapho iqembu le Harare City elizadibana khona lele Yadah enkundleni ye National Sports Stadium.
KuLivetalk namuhla kuhlelo “Diaspora Forum” sikhangela okwenziwa ngabadabuka eZimbabwe asebehlala kwamanye amazwe.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318. Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke. Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.