amalinks wokungena

Breaking News

Inhloko ZeNdaba Mpalakazi 14, 2020


Sebezinkulungwane ezilitshumi lanye-11,246 asebehloliwe batholakala beleCovid 19, eZimbabwe. Abasinde kulumkhuhlane, sebezinkulungwane ezedlula ezithoba munwe munye-9,451. Abalokhu begula bayedlula inkulungwane eyodwa lengxenye-1,458, labulala abangamakhulu edlula amathathu-307.

UMongameli Emmerson Mnangagwa namhlanje ulubhekise kwele Mozambique ukuyazwisisa udubo lwabahlamuki besi Islam abedlulisa amalawulo abalwisa lelo lizwe kule nkuthazo yokuba iSADC incede lelo lizwe ngoba udubo lolu lunacithekela emazweni angomakhelwane.

Omela ukuhlanyelwa kwezihlahla eZimbabwe, uAmbassador Never Bonde ukhuthaza uzulu ukuba aqhubeke ehlanyela izihlahla ezweni laloba iWorld Tree Day seyedlula. Lonyaka uzulu ukhuthazwa ukuhlanyela isihlahla somkhomo.

Ikhansili yakoBulawayo ikhuthazwa ukuba ixoxisane lozulu kanye lengcwethi zomsebenzi wokutholakala kwamanzi ukuze ithole amacebo wokulungisisa udubo lwamanzi kuleli dolobho.

Abantu abadabuka eZimbabwe abafika phose inkulungwane ezimbili – 1,670 asebehlala kwele Kenya bathakazelela ukuphiwa kwabo nguhulumende amaphepha okubayingxenye yakulelolizwe iCitizenship.

Isikhulumeli seqembu leHighlanders uRonald Moyo usethembise abalandeli beqembu leli ukuba amakawuso afana lalawo avunulwa ngabadlali azatholakala kuzozonke indawo.

Abakhetha umongameli kwele Melika ababizwa ngokuthi yiElectoral College bakhangelelwe ukuvotela uMnu. Joseph Biden namhlanje, lobanje uMongameli Donald Trump esithi wanqoba kukhetho olwenziwe ekuqaleni kukaLwezi.

Ku Livetalk namhlanje sikhangela ingozi engehlela umhlubulo weSADC, yamaterrorist esiIslam abedlulisa amalawulo asebehlasele beqalela kweleMozambique.

Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.

Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.

Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.

Facebook Forum

XS
SM
MD
LG