amalinks wokungena

Breaking News

Inhloko ZeNdaba Mpalakazi 15, 2020


Kubhubhe abantu ababili ngokutshona kwelanga layizolo, eZimbabwe, bebulawa yiCovid 19, osekukhuphule inani lasebebulewe yiyo kwabangamakhulu edlula amathathu-309. Sebezinkulungwane ezilitshumi lanye-11,358 asebehloliwe batholakala belegcikwane leli elizweni jikelele.

ISouth Africa isiyethule imigoqo emitsha elawula impilo kazulu kulandela ukuqansa ngesivuvu kwenani labahlaselwa ngumkhuhlane weCovid-19, okuyinto esilethe ukukhathazeka okukhulu kuzizalwane zeZimbabwe ezisebenza kweleSouth Africa.

Ngalesi sikhathi uzulu elungiselela ukuhlanganela ndawonye lezihlobo labangane, ngekhefu leKhisimusi, ingcwethi zezempilakahle zikhuthaza abantu ukuthi baqhubekele phambili behlonipha iziqondiso zokuzivikela ekuthelelweni iCoronavirus.

Ikhansili yakoBulawayo ikhuthazwa ukuba ixoxisane lozulu kanye lengcwethi zomsebenzi wokutholakala kwamanzi ukuze ithole amacebo wokulungisisa udubo lwamanzi kuleli dolobho.

Namhlanje kweziphathelane lomnotho welizwe sicubungula indlela abantu abaziphandela ngayo ngesikhathi uhulumende esithi ihlelo zakhe ziyaphumelela kodwa inengi lisithi lithwele amagabha avuzayo.

Isikhulumeli seqembu leHighlanders uRonald Moyo usethembise abalandeli beqembu leli ukuba amakawuso afana lalawo avunulwa ngabadlali azatholakala kuzozonke indawo.

Abakhetha umongameli kwele Melika ababizwa ngokuthi yiElectoral College izolo, bavote bekhetha okusemthethweni, uMnu. Joseph Biden lomsekeli wakhe uNkosikazi Kamala Harris ukuba bakhokhele eleMelika okweminyaka emine elandelayo phansi kohlelo lokhetho lwalelo lizwe. Kodwa uMongameli Donald Trump lokhu esala ukuvuma ukuthi unqotshiwe.

Ku Livetalk namhlanje kuhlelo “The Connection” sixoxa labatsha ngenhlelo abalazo zokufundisana ngokuzivikela kuCovid 19 ikakhulu khathesi abantu sebelungiselela ikhefu leKhisimusi.

Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.

Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.

Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.

Facebook Forum

XS
SM
MD
LG