amalinks wokungena

Breaking News

Inhloko ZeNdaba Mpalakazi 8, 2020


Phakathi kwabantu abedlula ikhulu lamatshumi amabili-121, abahlolwe batholakala belegcikwane leCovid 19, ngokutshona kwelanga layizolo, abangamatshumi edlula ayisikhombisa-74, ngabesigabeni seMatebeleland North, abangamatshumi edlula amathathu bengabakoBulawayo. Lokhu kutsho ukuba bayedlula ikhulu abemhlubulweni weMandebeleni abatholakale belegcikwane leli izolo-106.

Abenhlanganiso elwela ilungelo loluntu eye Amnesty International, bakhuthaza amalunga edale lephalamende emazweni asenhlanganisweni yamazwe angezansi kwezwekazi le Africa eyeSouthern African Development Community (SADC) ukuba aqinise imizamo yokubumba imithetho elondoloza ilungelo loluntu kulumhlubulo.

Abazali labafundi bathi bakhathazekile kakhulu ngesinqumo sikahulumende sokuthi bahlawule imali yesikolo bona abafundi bengafundanga okwesikhathi esingayi landawo lokhe zavulwayo izikolo kulandela ukuvalwa kwazo ngenxa yobhubhano lweCovid-19 ngoMbimbitho.

Osemele ukugcotshwa ukuba ngumongameli weleMelika uMnu. Joe Biden ukhangelelwe ukukhetha uRetired General Lloyd Austin ukuthi abe ngonsundu wakuqala ukuthatha isikhundla sokuba ngumpathintambo obona ngezomvikela welizwe.

Ngeminye iminyaka ngalesi sikhathi umnyaka usuphela izisebenzi zivame ukuthola iholo le bonus kodwa lonyaka zilutshwana kakhulu izisebenzi ezizayithola ngenxa yokungamanga kuhle komnotho welizwe kanye lobhubhane lwe coronavirus.

Ku Livetalk namhlanje kuhlelo lwabatsha olwe “The Connection” sikhangela ukuqonga kwenani labatholakala beleCovid 19, kanye lokunanzwa kosuku lokulondolozwa kwelungelo loluntu ele Human Rights Day, elinanzwa mhlaka 10 Mpalakazi.

Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.

Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.

Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.

XS
SM
MD
LG