amalinks wokungena

Breaking News

Inhloko ZeNdaba Mpandula 14, 2021


Ubhubhane lweCovid-19 luqhubekela phambili luhlasela isizwe nanko izolo abogatsha lwezempilakahle bethi abantu abalikhulu lamatshumi amathathu-130 bahlolwe bafumanwa belegcikwane leli kuthi abahllanu balahlekelwa yimpilo. Uzulu uveza ahlangana lakho ngesikhathi ehlaba ijekiseni eyeCovid-19 Vaccine.

Sebeyizigidi phose ezintathu– 2,856,955, asebehlatshwe ijekiseni yakuqala eyeCovid 19 Vaccine, lokhe lwaqalayo lolu hlelo eZimbabwe. Sebephose bafike izigidi ezimbili - 1,894,780, asebehlatshiwe ijekiseni lesibili, kubika abogatsha lwezempilakahle.

Izikolo ezinengi zikhala ngokuthi kazila okokusebenzisa ukuhlola ukuthi umuntu uleCovid-19 na, loba hatshi, amatest kits, lanxa uhulumende wathi izikolo zilungele ukuvula.

Uzulu uveza ukukhathazeka ngesaziso esisanda kwethulwa ngabenkampani yamandla kagetsi eye Zimbabwe Electricity Transmission & Distribution Company - ZETDC ukuthi sebezoqhuba uhlelo lokucitshela abantu lamankampani amandla kagetsi ngoba ifuna ukulondoloza akhona wona asemalutshwana ngemva kokuqhamuka kodubo lokungasebenzi kuhle kwemitshina esititshini seHwange kanye lokuthi kulomsebenzi wokulungisa idamu le Kariba osekubangele ukucitshwa kwemitshina ephehla ugetsi.

Kweziphathelane lomnotho welizwe: Uhulumende uthi iqula lakhe likhangelelwe ukuhlangana lamankampani edlula amatshumi amahlanu namuhla embuthanweni wezamabhizimusi owe Kinshasa Outward Seller Mission elizweni leDemocratic Republic of Congo ozathuthukisa ezokuthengiselana.

Kababoni ngaso linye abalandeli bomdlalo wenguqu phezu kosekelo lwemali oluvela kunkampani ye Sakunda olubikwa luzaphiwa amaqembu abalisa ele Highlanders kanye lele Dynamos.

Ku Livetalk namhlanje kuhlelo “The Connection” sixoxa labatsha sikhangela isimo sokumelana leCovid 19 kanye lokuqhubeka kohlelo lokuhlatshwa kwabantu ijekiseni yokuzivikela kulei gcikwane.

Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.

Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.

Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.

Facebook Forum

XS
SM
MD
LG