Abantu abaphose bafike inkulungwane ezilitshumi lasikhombisa-16,938 abahlatshwe ijekiseni eyeCovid 19 Vaccine, izolo, bakhuphule inani lasebehlatshwe ijekiseni le okwakuqala laya kuzigidi phose ezintathu– 2,873,893, lokhe lwaqalayo lolu hlelo eZimbabwe. Sebephose bafike izigidi ezimbili - 1,926,947, asebehlatshiwe ijekiseni lesibili, kubika abogatsha lwezempilakahle.
Amalungiselelo ombukiso weZimbabwe International Trade Fair asesemaphethelweni njalo umongameli Mnangagwa nguye okhangelelwe ukuwuvula ngokusemthethweni.
Abamele ibandla lePatriotic Zimbabweans Party, elikhokhelwa nguMnu. Charles Mutama, namuhla bakhulume labaphethe ikhomithi yedale lephalamende ebona ngezemithetho ngesicelo sabo esokuthi izizalwane zeZimbabwe ezihlala kwamanye amazwe kumele zivote kukhetho oluzakwenziwa ngomnyaka ka2023.
Izizalwane zeZimbabwe esezihlala kweleSouth Africa ziveza ukukhathazeka ngokuthula kukahulumende walelo lizwe, ngodaba lokuthi amapermit aweZimbabwe Special Permit, aphiwa abantu abazinkulungwane ezingamakhulu phose amabili, azavuselelwa na kumbe hatshi nxa ephelelwa yisikhathi ekupheleni kukaMpalakazi.
AbeZimbabwe abaphila ngokuthenga bethengisa imphahla emazweni afana leBotswana leSouth Africa bakhuthaza uhulumende ukuthi avumele labo asebehlatshiwe ijekiseni yeCovid-19, ukuthi bechaphe imingcele besiyakwenza ibhizimusi.
Kulemibiko ethi uNorman Mapeza nguye osethethe isikhundla sikamqeqetshi weqembu lama Warriors.
Ku Livetalk namhlanje kuhlelo “Diaspora Forum” sikhangela okwenziwa yizizalwane zeZimbabwe esezihlala kwamanye amazwe.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.