amalinks wokungena

Breaking News

Inhloko ZeNdaba Mpandula 29, 2020


Inani lasebebulewe yiCovid 19, eZimbabwe likhuphuke laya kwabangamakhulu edlula kancane amabili-228. Sebezinkulungwane phose eziyisitshiyagalombili-7,816, asebefunyenwe belegcikwane leli, kwasila abazinkulungwane ezedlula eziyisithupha-6,112.

Abafundi abalungiselela ukubhala imihloliso yalonyaka abayibo abavulelwe izikolo, babuyiselwe emakhaya namhlanje, ngenxa yokuswelakala kwababalisi ezikolo. Ababalisi abanengi bakhalala umsebenzi bekhala ngeholo eliphansi.

Ugwalo lwempumela yokucubungula okuthe kwenziwa ngabenhlanganiso ecubungula ngezombusazwe eye Zimbabwe Democracy Institute - ZDI, olulesihloko esithi “ Transition Politics in the post - Mugabe ” luveza ukuba abakubutho yibo ababusayo elizweni, besebenzisa nje umkhokheli welizwe ukufeza izifiso zabo.

Ingcwethi ezicubungula ukumemetheka kwegcikwane leCoronavirus eZimbabawe zithi, uhlelo lweCOVID-19 lockdown luphazamise impilo zabatsha elizweni ngendlela ekuzinga laphezulu.

EleBotswana selengezelele uhlelo lwe State of Emergency ngenyanga eziyisithupha, kusiyafika kuMbimbitho womnyaka ozayo. Lokhu kutsho ukuthi okufana lemngcele kuzaqhubeka kusavaliwe okwakhathesi, okuyizindaba ezingamnandi kwabanye abeZimbabwe abahlala kweleBotswana abasebelesikhathi bengaboni izihlobo.

Abantu abanengi bayathandabuza ukuthi ibandla leMDC-T elikhokhelwa nguNkosazana Thokozani Khupe lelika Mnu. Nelson Chamisa eleMDC Alliance angamanyana alwisane lele Zanu PF kulandela ukumanyana kwabatsha bamabandla la abathethe isigodlo samacele womabili engakadabuki phakathi eseHarvest House.

Ku Livetalk namhlanje kuhlelo “The Connection” sikhangela okwenzakala elizweni kwezombusazwe lesimo sokumelana leCovid 19.

Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.

Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.

Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.

Facebook Forum

XS
SM
MD
LG