amalinks wokungena

Breaking News

Inhloko ZeNdaba Mpandula 29, 2021


Phakathi kwabantu abahlolwe izolo eZimbabwe kutholakale abaphezu kwamakhulu amathathu -345, beleCovid 19, kwathi abathobaminwembili-8, babulawa yileli gcikwane.

Okwamanje ilizwe selenelise ukuhlaba abantu abedlula izigidi ezintathu-3,060,476, ijekiseni yokuzivikela kuCovid 19, kodwa abangaba yizigidi ezedlula kancane ezimbili babo- 2,229,310 yibo asebehlatshwe amajekiseni wonke womabili, ifirst lesecond dose, kubika abogatsha lwezempilakahle.

UMahluli omkhulu e Zimbabwe uJustice Luke Malaba, lamhlanje ufungise abahluleli abathobaminwemibili ukuqala umsebenzi, emthethwandaba waphezulu oweHigh Court, abasanda kukhethwa nguMongameli Emmerson Mnangagwa, ngemva kokuvivinywa yikomishini ebona ngemithetho eyeJudicial Service Commission.

Umsekeli kamongameli welizwe uMnu. Constantine Chiwenga, uthi uhulumende uyathokoza okwamagama ngesivuno sabalimi salonyaka esithi bazaqhubekela phambili besenza konke okusemandleni abo ukuthuthukisa umsebenzi wokulima elizweni.

Izakhamizi zeNkayi zithi kusobala ukuthi uhulumende kazimiselanga ukuphutshisa uhlelo osolulesikhathi eside lwasungulwayo, olokulungisa umgwaqo osuka eNkayi usiya koBulawayo lezinye indawo, lanxa esithi uzalugqiba.

Isikolo esinceda abantwana abaswelayo ukuba bathole izifundo eziphezulu eseUnited States Student Achivers Program (USAP) Community School eZimbabwe sesidinga abazangena kuzifundo ezitshiyeneyo ngomnyaka ozayo.

Umongameli Mokgweetsi Masisi wakweleBotswana ngoLwesithathu ugcizelele ukuthi kuqakathekile ukuthi kwesulwe izijeziso zomnotho ezafakelwa eleZimbabwe.

Inkampani yendizamtshina eyeSouth African Airways isiqalile umsebenzi wokuthwala abantu lemphahla ngendizamtshina kuhambo lokuya eZimbabwe lokuphenduka, ngemva komnyaka olengxenye indizamtshina zayo zingaphaphi.

Ku Livetalk namhlanje kuhlelo “Diaspora Forum” sikhangela okwenziwa yizizalwane zeZimbabwe esezihlala kwamanye amazwe.

Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.

Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.

Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.

Facebook Forum

XS
SM
MD
LG