Endabeni zethu lamhlanje ……………..
************* Abalandeli bomanyano wamabandla aphikisayo oweMDC Alliance ababotshwe betshengisela ngoLwesithathu lweviki edluleyo, bakhululiwe ngumthethwandaba kamantshi we Harare namhlanje ngemva kokuvunyelwa ukuhlawula isibambiso sebail.
**************Umkhokheli welinye lamacele e MDC - T, uNkosazana Thokozani Khuphe utshele umhlangano lentathelizindaba ukuba uyemukela okutshiwo nguMongameli Emmerson Mnangagwa ukuba kuzamele kubunjwe ama Khomishini azimeleyo ukuhlolisisa udlakela olubulalise abantu abayisithupha ngabebutho ngoLwesithathu olwedluleyo.
************* Izihambi eziphuma eZimbabwe zingena emazweni afana leBotswana leSouth Africa zithi abohlangothi lweZimbabwe Revenue Authority (ZIMRA) ziyabakhuthuza bedinga imali yohlobo lwama Bond Notes, ukuthi ingaphumi elizweni, ngesikhathi kusilela imali emabhanga.
************* Uhulumende weBhilithane, umanyano weEuropean Union kunye loweMelika bakhiphe umbiko ngemva kokhetho lweZimbabwe lwangeviki ephelileyo esola ukwephulwa kwamalungelo abantu lodlame olusetshenziswe ngabebutho ukudubula bebulala abantu abayisithupha.
********** KuLiveTalk namhlanje kuhlelo lwabasakhulayo olwe “The Connection” sixoxa labasakhulayo ukuthi sizwe imibono yabo ngemva kokhetho lwangeviki edluleyo. Thumelani imilayezelo yenu ku WhatsApp kunombolo ezithi 001 202 465 0318 kumbe enkundleni yokukhulumisana lokuzilibazisa yebulenjini eyeFacebook ekhasini lethu ele VOA Ndebele. Lingakhuthwa yilezindaba lezinye kuStudio 7 ngo half past 7 ntambama, kumagagasi athi 909 am, 4930, 15580 laku 6080 kilohertz kuShortwave. Lingakhohlwa ukuthi sikuWhatsapp lakuFacebook ku VOA Ndebele.