amalinks wokungena

Breaking News

Inhloko ZeNdaba Ncwabakazi 25, 2021


Uhulumende weZimbabwe wengezelele njalo isikhathi sokusebenza kweziqondiso zeCovid-19 Lockdown ngamanye amaviki amabili, buye izolo ugatsha lwezempilakahle lukhuphe umbiko othi abantu abangamakhulu amathathu labalitshumi elilesitshiyangalonye-319, bahlolwe bafunyanwa beleCovid-19 kuthi abangamatshumi amabili lasikhombisa-27, babulewe yilo umkhuhlane.

Emizameni yokukhuphula inani labantu abahlatshwa ijekiseni elivikela iCovid-19 ikhansili yakoBulawayo yengeze inani lendawo zomthola mpilakahle ezisebenza zizimele ukuba zihlabe abantu behlawula kusiya ngokuthi uhlatshwe ngudokotela kumbe ngabongi.

Ngokutshona kwelanga layizolo kulabantu abazinkulungwane phose amatshumi amane – 37,016 abakade sebe hlatshwe ijekiseni lakuqala lokuzivikela kuCovid 19, eleVaccine, kusitsho ukuba sebesedlula izigidi ezimbili – 2,382,359 asebehlatshwe leli jekiseni okwakuqala. Kuthi abazinkulungwane ezedlula ezingamatshumi amabili lantathu -23,397, abahlatshwe ijekiseni lesibili bengeze leli inani lisiya kwabaphezu kwesigidi lengxenye-1,506,445.

Izizalwane zeZimbabwe esezihlala kweleSouth Africa zithi zikhathazekile kakhulu ngokuqansa kwenani labantu abangasasebenziyo elizweni lelo okugoqela osowabo.

Abanye abeZimbabwe abahlala kweleBotswana bengelamaphepha aqondileyo, bathi bayaphendukiswa endaweni lapho okuhlatshwa khona ijekiseni yeCovid-19. EleBotswana lalithembise ukuthi wonke umuntu uzahlatshwa ijekiseni kungakhathalekile ukuthi udabuka kuphi.

Kuhlelo lapho esixoxa khona lezizalwane ze Zimbabwe esezihlala kwamanye amazwe kuliviki silosakhulayo uBabusi Nyoni yena owasungula inkampani yokuphathisa ngendleko zokwelaphisa abadala ekhaya eye Sila Health.

Ku Livetalk namhlanje kuhlelo “Diaspora Forum” sikhangela ukuqeliswa kwesikhathi seCovid 19 Lockdown lokunye okwenziwa yizizalwane zeZimbabwe esezihlala kwamanye amazwe.

Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.

Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.

Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.

Facebook Forum

XS
SM
MD
LG