Inani lasebebanjwe umkhuhlane weCovid 19, eZimbabwe, lengezwe ngabantu abahlanu abahlolwe izolo osokukhuphule leli nani laya kumakhulu phose amathathu-282.
Uhulumende sequme ubudlelwano bakhe lenkampani ebikwa isebenzelana lendodana kaMongameli Emmerson Mnangagwa eyeDrax International kulandela ukukhonona kukazulu phezu kwendlela inkampani le eyaphiwa ngayo umsebenzi wokudingela ilizwe izinto zokuvikela igciwane leCoronavirus kungalandelwanga umthetho. Inkampani le yayizahlawulwa imali engangeUS$60 million.
Kudaba olwesatshelwa ukuthi lulakho ukumemethekisa igciwane leCoronavirus, uhulumende uthi ikhomithi yephalamende ebona ngezemithetho izabuthanisa uzulu ezigabeni ezitshiyeneyo kuqala mhlaka 15 kulinyaka kusiyafika mhlaka 19, isizwa imbono yakhe ngokuguqulwa kwesisekelo sombuso welizwe okuzanywa libandla elibusayo phansi kweConstitutional Ammendment No 2.
Ziyanda izikhalazo zokuthi izisebenzi zibhadalwa ngedola leMelika ngenxa yokugugudeka kwemali yeZimbabwe okubangela ukukhwela mahlayana kwentengo yezinto ezitolo.
Abazali, abafundi kanye lababalisi elizweni, bathukuthele ngesinqumo sikahulumende, esokuqhubekela phambili elungiselela ukuvulwa kwezikolo, kodwa kungela ndlela echachileyo yokuvikela ukumemetheka kweCovid 19.
Ku Livetalk namhlanje kuhlelo lwabatsha ‘The Connection’ siqhubekela phambili sikhangela umonakalo osudalwe yikuqhamuka kweCoronavirus kanye lokudonselana okuphakath kwamacele amabili awebandla eliphikisayo eleMDC.