Endabeni zethu lamhlanje ……………..
****** Uhulumende ukhuthazwa ukuba angaze asebenzisa indlela ezilobandlululo emizameni yakhe yokufuqa abalezikwelede kunkampani yamandla ka getsi ukuba bahlawule inkampani ewaphekayo lokuwathengisa eye Zimbabwe Electricity Supply Authority – ZESA kubandlululwa abayanga kodwa abalemali labalamandla kwezombusazwe bephathwa ngonanzelelo lanxa ubufakazi buveza ukuba yibo abalezikwelede zemali enengi.
********** Abenhlangothi ezitshiyeneyo zempilo bathole ithuba lokuxoxisana lomeli wedale lephalamende uMnumzana Kucaca Phulu, ngomthetho wemitshado osalolongwa emhlanganweni oqoqwe ngabenhlanganiso yeEvangelical Fellowship of Zimbabwe imanyene leye Citizen Africa Foundation.
******** Umsekeli womkhokheli weMDC uMnu Tendai Biti uthi uMongameli Emmerson Mnangagwa ulakho ukuhluthunelwa intambo zombuso ngamasotsha ngendlela uMnu Robert Mugabe agenqulwa ngayo nxa engaphuthumanga walungisisa umnotho welizwe oqhubeka ubhidlika njalo nje.
********** KuLiveTalk namhlanje kuhlelo lapho esiphatha indaba zabeZimbabwe asebehlala emazweni olwe “Diaspora Forum” siphatha udaba lukahulumende oseqhatshe inkampani yeMelika yokumncedisa ukukhankasela ukwesulwa kwezijeziso zenotho. Nxa lifuna ukungena kuhlelo thumelani imlayezelo kunombolo ezithi 0012024650318. Lingakhuthwa yilezindaba lezinye kuStudio 7 ngo half past 7 ntambama lango half past 6 ekuseni, kumagagasi athi 909 am, 4930, 15580 laku 6080 kilohertz kuShortwave.