Inhlanganiso yeLaw Society of Zimbabwe ithi isilobele umphathintambo wezemithetho uMnu Ziyambi Ziyambi incwadi isithi kumele aveze ubufakazi bokuthi kulabahlule bemithethwandaba abasetshenziswa yizitha zeZimbabwe ngemva kokuthuka abahluli phezu kwesinqumo sokususa uMnu Luke Malaba esikhundleni sikamahluli omkhulu welizwe uChief Justice. Ngakolunye uhlangothi, uMongameli Emmerson Mnangagwa uthi uhulumende wakhe uyayihlonipha imithethwandaba kanye lezinqumo zayo.
Abogatsha lwezempilakahle babika ukuba sebezinkulungwane ezedlula amakhulu ayisithupha- 600,579, abantu asebenelise ukuhlatshwa ijekiseni yakuqala eyeCovid 19 Vaccine, eZimbabwe jikelele njalo sebezinkulungwane ezingamakhulu edlula amabili-231,375, asebehlatshwe ijekiseni yesibili.
Izizalwane zeZimbabwe kweleSouth Africa zithi zikhathazekile ngesaziso sikahulumende sokuthi nxa bebuyela ekhaya bazaqala bagcinwe endaweni ethile okwamalanga behlolwa ukuba abalayo yini icoronavirus njalo behlawulela indleko yokugcinwa lapho kumbe bayezihlawulela ukuhlala ehoteleni.
Umphathintambo obona ngobudlelwano beZimbabwe lamanye amazwe womhlaba, uMnu. Frederick Shava uthi eleBotswana selithembise ukuhlaba ijekiseni yeCovid-19 Vaccine, bonke abeZimbabwe abahlala eBotswana, kungakhathelekile ngesimo sabo samaphepha okuhlala elizweni.
Izakhamizi zemzini weMganwini zihlaba omkhulu umkhosi ngamanzi eziwathola empompini angahlambulikanga, osekubangele ukuqhamuka komkhuhlane wesihudo. Lokhu kubangele njalo ukuba abenhlanganiso yezakhamizi, eyeBulawayo Progressive Residents Association bathathe inyathelo lokuhlolisisa amanzi la.
Ku Livetalk namhlanje kuhlelo “Diaspora Forum” sikhangela okwenziwa yizizalwane zeZimbabwe eseihlala kwamanye amazwe.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.