Abaphila ngokuthengisa abakoBulawayo bamukele ngentokozo uhlelo lokuhlatshwa ijekiseni eye COVID 19 Vaccine bethi lokhu kuzakwengeza amathuba okuthi uzulu avikeleke njalo kuvulwe indawo zokuthengisela abantu babuyele empilweni yaphambilini kokuqhamuka kwalolu bhubhane. Uhlelo lolu oluqale namhla lukhangelelwe ukuqhutshwa okwensuku ezilitshumi.
Sebebanga kunkulungwane ezingamakhulu phose athobaminwemibili- 797,715, abantu asebenelise ukuhlatshwa ijekiseni yakuqala eyeCovid 19 Vaccine, eZimbabwe jikelele njalo sebezinkulungwane ezedlula amakhulu amahlanu-571,721, asebehlatshwe ijekiseni yesibili kubika abogatsha lwezempilakahle.
Ngokutshona kwelanga layizolo, abantu abedlula inkulungwane lengxenye-1,540, batholakale beleCovid 19, leli gcikwane labulalala abangamatshumi amathathu lantathu-33.
Ibhanga elikhulu lelizwe, eleReserve Bank of Zimbabwe, namuhla lazise ukuthi selethule imali yephepha eyeZ$50 ebambeneyo ezaqala ukusebenza kusasa. Kodwa abanye bathi ayisoze incede ngalutho limali nanku ayeneli lesinkwa esisodwa kumbe ukugada umtshona.
Ingcwethi kwezomnotho, inhlanganiso ezisebenzisana lozulu lozulu jikelele bakhuthaza uhulumende ukuba enze uphenyo edabeni olusegudwini oluvezwe ngabenhlanganiso ye The Sentry yakweleMelika kundlela usomabhizimusi olodumo umnumzana Kudakwashe Tagwirei asebenzisana ngayo lohulumende, engacacanga.
Kuhlelo lapho esixoxa labatsha namuhla sixoxa loMnu. Addmore Sibanda, osakhulayo okumsebenzi wezandla ohlala eKwekwe lapho okuhlaselwe ngolaka yiCoronavirus, ukhuthaza abakumsebenzi wezandla, ukuthi bahloniphe iziqondiso zokuvikela ukuthelelanwa lula kweCOVID-19.
Ku Livetalk namhlanje kuhlelo “The Connection” sikhangela ukuqansa kwenani lasebebulawa yiCovid 19 kanye labafunyanwa belegcikwane leli eZimbabwe ngendlela ethusayo.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.
Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.
Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.