amalinks wokungena

Breaking News

Inhloko ZeNdaba Ntulikazi 16, 2021


Inani labantu ababulawe yiCovid 19 eZimbabwe ngokutshona kwelanga layizolo babe ngamatshumi athoba minwe mibili lasithupha-86 Kuthi abantu abazinkulungwane zimbili phose lengxenye-2,491, batholakale belegcikwane leli, kubika abogatsha lwezempilakahle.

Ugatsha lolu luphinde lwethula umbiko othi wonke umuntu oya emtholampilo elanda ukuyahlatshwa ijekiseni eye Covid 19 Vaccine, kumele ahlatshwe nxa kuyikuthi ufike ihola lesihlanu ntambama lingakatshayi. Abangela zithupha kumbe incwadi zokuzalwa amabirth certificate labo babikwa kumele bahlatshwe kungamelanga bavalelwe phandle.

Babikwa sebesedlula kancane isigidi esisodwa-1,036,252 abantu asebenelise ukuhlatshwa ijekiseni yakuqala eyeCovid 19 Vaccine, eZimbabwe jikelele, njalo sebezinkulungwane ezingamakhulu edlula ayisithupha-630,610, asebehlatshwe ijekiseni yesibili.

Umongameli Cyril Ramaphosa weSouth Africa ubhoda-bhode eKwaZulu Natal namuhla ehlolisisa umonakalo emavinkilini kulandela udlakela oluqhamuke kulelolizwe ngemva kokubotshwa kukaMnu. Jacob Zuma.

Intathelizindaba eyalwa impi yenkululeko uMnu Soul Gwakuba Ndlovu kasekho. UNdlovu ubikwa ebhubhele esibhedlela koBulawayo namuhla eseleminyaka yokuzalwa engu87.

Kuhlelo Woza Friday namuhla sihamba leqembu elicula umdumo werhumba eleMsasane Express Band lona elisanda kwethula idlalade elilesihloko esithi ‘Umtshado Wevila’.

Iqembu labesilisa elimela ilizwe leZimbabwe emdlalweni kakhilikithi lidinga 277 runs ukuze linqobe ele Bangladesh emdlalweni wakuqala owohlobo lwe One Day International oqhutshelwa esigodlweni namhla.

Ku Livetalk namhlanje sikhangela ukuqansa kwenani lasebebulawa lokubanjwa bele Covid 19 eZimbabwe.

Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318.

Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke.

Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.

Facebook Forum

XS
SM
MD
LG