Endabeni zethu lamhlanje ……………..
************* Selize lafika ilanga elikade limelelwe ngabeZimbabwe abanengi emhlabeni jikelele, elokhetho lokudinga umongameli amalunga edale lephalamende lamakhansila, lalamhlane mhla ka 30 Ntulikazi. Sikhulumanje umsakazo wako oweStudio uqale ukusakaza ngabo2 emini usiyagqiba lolu hlelo ngo5 silethulela okwenzakalayo endaweni ezitshiyeneyo zelizwe abantu bevota. Wothi sizwe ukuthi umumo unjani okwamanje abantu bevota endaweni ezitshiyeneyo zelizwe, ngelihlo lentathelizindaba zeStudio 7.
**************Abantu bavota ngokuthula okumangalisayo koBulawayo lobanje indwendwe zizinde njalo zingatshovi. umkhokheli welinye lamacele aweMDC-T uNkosazana Thokozani Khuphe uvote ngemva kwemini enkulu eStanley Hall emzini omkhulu weMakokoba kuthi uMsekeli kaMongameli weMRP uNkosazana Presia Ngulube yena uvotele esikolweni seHelemu Primary emzini weNjube ngehola letshumi ekuseni. Usizi bakhona ababhalisela ukuvota njalo bathola imibiko eZEC ebakhuthuza ukuyavota Kodwa abenelisanga ukuvota ngoba amagama abo engekho kuluhlu lwababhalisela ukuvota lonyaka. Abaphila lobugoga bona kade bekhala ngokuthi bavota nzima.(Lumbiko uvele kuAnnahstacia Ndlovu intathelizindaba yeStudio 7 ekoBulawayo.)
************* UMkhokheli womanyano wamabandla aphikisayo owe MDC Alliance, uMnu Nelson Chamisa ngomunye wasebevotile. UChamisa uvotele emzini weKuwadzana, eHarare namhlanje emini lapho athe uselindele ukuthatha isikhundla sokuba nguMongameli. Kusenjalo owayenguMongameli uMnu Robert Mugabe laye uvotile emzini owe Highfields, eHarare. Lumbiko luwuphiwa ngu Gibson Bhebhe ngise Harare.
************* Kwezinye indawo zako Bulawayo uzulu ukhala ngendwendwe ezingatshoviyo endaweni zokuvotela kumapolling stations. Sidibane labanye abakade bevota okwakuqala bekhanya bejabule ukuthi benelisile ukuvota lonyaka. UMnu. Dumiso Dabengwa umkhokheli weZapu uvote ekuseni njalo uthi uzulu kumele ananzelele ngoba impama zimbili emaphepheni okungaphambanisa abavotayo. Umkakhe uphindiselwe emuva ngoba ube lenzipho zokufakela njalo eziphendiweyo. (Lumbiko uvele kuBathabile Masuku intathelizindaba yeStudio7 ekoBulawayo.)
********** Omunye wabancitisa kukhetho lokudinga umunongameli engumkhokheli welizwe njalo,umnumzana Emmerson Mnangagwa uthi uyajabula ukuthi ukhetho luqhutshwa ngokuthula elizweni kusukela ngesikhathi kuqhutshwa imikhankaso lalamuhla uzulu evota wabonga izizalwane zezimbabwe ngokuziphatha kwabo ngalesi sikhathi sokhetho lwalonyaka lokudinga inkokheli kahulumende. (Lumbiko uvele kuMavis Gama intathelizindaba yeStudio7 eseKwekwe.)
********** Abantu bakhala ngokuba imifanekiso yalabo abavotelwayo kukhetho lwanamhlanje kayikhanyi kuhle okuyinto eyenza bethathe isikhathi eside besadinga labo abafuna ukubavotela bona abangene ngobunengi kukhetho lwalonyaka. Abanye njalo ngabakhala ngokuba bekungela ngcazelo epheleleyo ngokwehlukaniswa kwabavotayo kusentshenziswa i-alphabet okudale ukuba abanye bephendukiswe se befike lapho okuvotelwa khona ngoba belahleke bangena emzileni ongasiwo. Kusenjalo abatsha baphume ngobunengi besiyavota kukhetho lwanamhlanje okuyinto ebingavamanga eminyakeni eyadlulayo. (Lumbiko uvele kuJosephNjanji intathelizindaba yeStudio7 ekoBulawayo.)
********** KuLiveTalk lamuhla sikhangela umumo wokwenzakala eZimbabwe abantu betshone bevota endaweni ezehlujkeneyo zelizwe bekhetha umongameli, amalunga edale lephalamende kanye lamakhansila elizweni lonke. Thumelani imilayezelo yenu ku WhatsApp kunombolo ezithi 001 202 465 0318 kumbe enkundleni yokukhulumisana lokuzilibazisa yebulenjini eyeFacebook ekhasini lethu ele VOA Ndebele. Lingakhuthwa yilezindaba lezinye kuStudio 7 ngo half past 7 ntambama, kumagagasi athi 909 am, 4930, 15580 laku 6080 kilohertz kuShortwave. Lingakhohlwa ukuthi sikuWhatsapp lakuFacebook ku VOA Ndebele.
