Isimo seCovid-19 siqhubeka singamanga kahle eZimbabwe ngoba inani labantu abahlolwe bafumanwa belegcikwane leli likhuphuke ngokuphethwe kabili kuqathaniswa lelakuthange. Abezempilakahle lohulumende bakhuthaza uzulu ukuba alandele iziqondiso zokuvimba ukuthelelanwa lula kweCovid-19.
Isikhwama esiphilisa imuli elabantu abayisithupha sesikhuphuke okwamagama osekudale ukuhlupheka okukhulu phakathi kwezisebenzi zikahulumende.
Uhulumende uzahlangana lezisebenzi zakhe kusasa bekhulumisana ngodaba lweholo. Inkulumo lezi ngezakuqala lonyaka njalo ziza ngesikhathi izisebenzi zikahulumende lezi ziqina ngokuthi zifuna ukuholiswa ngedola leMelika.
Umphathintambo wedolobha leHarare umnumzana Oliver Chidhawu uxwayisa abakhe izakhiwo ezingekho emthethweni beqhuba amabhizimusi abo endaweni ezingavunyelwayo ukuba bahle bazibhidlize njengoba abogatsha lwakhe bengayi kubuyela muva emsebenzini wokubhidliza izakhiwo ezingekho emthethweni okuqalwe emzini weMbare ngempelaviki.
Umhlangano womanyano wamazwe akuzwekazi leSADC owokucubungula udaba lwamalwecatsha eMozambique usungulwe namuhla eMozambique, lapho umsekeli kamongameli uMnu. Constantino Chiwenga amele umongameli Mnangagwa.
Iqembu labesilisa elimela iZimbabwe emdlalweni wenguqu lidliwe one kazero izolo ngele Senegal, emdlalweni walo wakuqala kumncintiswano we Africa Cup of Nations oqale ngeSonto kwele Cameroon.
KuLivetalk namuhla kuhlelo “The Connection” sikhangela okwenziwa ngabatsha ngesikhathi ilizwe selilungiselela ukhetho lwamaBy-elections ngenyanga kaMbimbitho.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318. Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke. Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.