amalinks wokungena

Breaking News

Inhloko ZeNdaba Zibandlela 18, 2022


Ngokutshona kosuku lwayizolo kwabahlolwe iCovid 19 kutholakale abantu abangamakhulu phose amane-382, belegcikwane leli, labulala abalitshumi lanye-11, kubika abogatsha lwezempilakahle. Asebehlatshwe ijekiseni lakuqala lokuzivikela kuCovid 19 sebesedlula izigidi ezine-4,209,724. Kuthi asebehlatshwe amabili sebeyizigidi ezedlula ezintathu-3,236,083, kulabazinkulungwane phose amatshumi amathathu-28,740, asebehlatshwe elesithathu.

Izakhamizi zakoBulawayo kuhlanganisa labatshayeli bezimota basola kakhulu inyathela likaMansipala wakoBulawayo wokumisa ukulungisa imigwaqo esifahlakele ngesizatho sokuthi umhlaba usumanzi akusasebenzeki.

Isolwa kakhulu inkulumo yesikhulumeli sikamongameli welizwe, umnumzana George Charamba, yokuthi yikwephula umthetho, ukwaka amatshe ayisikhumbuzo salabo abatshabalala ngesikhathi sombhuqazwe weGukurahundi. U-Charamba utsho lamazwi ngesikhathi ephendula imibuzo emsakazweni we The Cite, phezu kwesehlakalo esenzakale ekupheleni komnyaka ka 2021 lapho kubhidlizwe khona ilitshe lesikhumbuzo salabo abatshabalala ngesikhathi seGukurahundi eBhalagwe, eMatebeleland North.

Kulabadabuka eZimbabwe abahlala eTurffontein kwele South Africa asebesuswa emikambo lezindlini abahlala khona yinhlanganiso ebizwa ngokuthi yiSouth Africa First, ekhanya engani incediswa ngamapholisa.

Uyantengantenga umkhankaso weqembu labesilisa elimela ilizwe le Zimbabwe emdlalweni kakhilikithi owokulwisa ukuba ngelinye lamaqembu azaphatheka kumncintiswano wezizwe zomhlaba ngomnyaka ka 2023.

KuLivetalk namuhla kuhlelo ‘The Connection’ sikhangela okwenziwa ngabasakhulayo baseZimbabwe ukuzinakekela phansi kwesimo seCovid 19.

Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318. Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke. Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.

XS
SM
MD
LG