UMeya weHarare uMnu Jacob Mafume uzaphindela emthethwandaba namuhla lapho azakuzwa khona ukuthi umantshi uyavuma na ukuthi akhululwe ngemali yesibambiso, i-bail kumbe uyaqhubeka evalelwe.
UMnu Mafume ubotshwe ngoLwesithathu ngeviki edluleyo esetheswa icala lenkohlakalo phezu kodaba lokuthengiselwa kukadadewabo isitanda yikhansili.
Umantshi ubemele aphe isinqumo sakhe phezu kwesicelo sikaMafume esokuthi akhululwe nge-bail ngoMgqibelo. Kodwa akusenzakalanga lokhu ngoba umantshi kasayanga enkantolo.
Igqwetha likaMafume uMnu Tonderai Bhatasara utshele umsakazo weStudio 7 ukuthi ukhangelele ukuthi akukhululwe namuhla.
Umsekeli wesikhulumeli sebandla leMDC Alliance uMnu Felix Magalela Mafa Sibanda uthi ukubotshwa kukaMnu Mafume yikumhlukuluza nje okwenziwa nguhulumende weZanu PF.
Kodwa ilunga leZanu PF uMnu Malaki Nkomo ukulandule lokhu esithi udaba lolu alulani lokwenza lezombusazwe.
Uthi bonke abetheswa amacala enkohlakalo bayabotshwa kungakhathalekile ukuthi ngabebandla leZanu PF kumbe ngabeMDC.