amalinks wokungena

Breaking News

Inkokheli Zomdabu Azilamandla Okuxazulula Isiga Sombhuqazwe weGukurahundi


Gukurahundi Plaque

Inhlanganiso elwela amalungelo oluntu eye lbhetshu LikaZulu ithi siyenelise ukwakha kutsha ilitshe eliyisikhumbuzo salabo abatshabalala ngesikhathi sombhuqazwe weGukurahundi eBhalagwe elanyamalala ngemva kokwakhiwa kwalo nyakenye.

Lokhu kwenzakala ngesikhathi izizalwane zemhlubulweni weMandebele leNkabazwe zikhuthaza ukuba udaba lombhuqazwe weGukurahundi kumele luphathwe yikhomishini yamazwe womhlaba ezimeleyo hatshi inkokheli yomdabu.

UMnu James Siphambano Ndebele weSilobela owalahlekelwa ngumnewabo ngesikhathi sombhuqazwe weGukurahundi ngomunye wabasola ukuthi loludaba ludazululwe yizinduna.

“Kulento engihlabileyo yokuthi uPresident uthi indaba le idazululwe yizinduna, angiboni ukuthi izinduna zingena njani, vele angiboni ukuthi induna ingathi buyina lapha umnewenu wathathwa asikhulumeni, akulanto induna engayitsho isibuze thina ngaphandle laye nxa wathathelwa owakwabo, kubuhlungu njalo ngibona ingathi badlala ngathi lapha, lokhu ukuthi bafuqela kunduna zezigaba akusebenzi, induna ingaze isibize ngabafowethu labomakhelwane angingeke ngiye ngoba kimi kufana lokuthi uyabe emele labo abalomlandu wokuphatheka kumbhuqazwe iyabe imele bani induna?”

UMnu Mqondisi Ndebele isakhamuzi sakoBulawayo uthi umongameli weZimbabwe udlala umacatshelana ngodaba lweGukurahundi.

“UMongameli Mnangagwa udlala umacatshelana ngodaba lombhuqazwe weGukurahundi, wenza ingathi ufuna ukululungisa kanti ufuna ukuthanyelela ngaphansi kwekhabothi ngoba uyakwazi ukuthi ungomunye wabantu abaphatheka phakathi kwayo ngoba lathi uma sikhangela akulandlela angalungisa ngayo ufuna nje ukuba isikhathi sakhe sokubusa sidlule.”

UMnu Desire Moyo umlingisi uthi uyathaba ukuba umongameli usekhuluma ngalo loludaba kodwa angabi ngumahluleli kuloludaba.

“Ngikhangelele ukuba uhulumende asilungisele loludaba kungabi yinganekwane kumbe ukulibhana ngaloludaba, ngiyathaba ukuba umongameli usebenzisa iwofisi yakhe kodwa engabi ngumahluleli kuloludaba ngoba waphatheka kilo.”

Igqwetha elilwela amalungelo oluntu, uMnu Nqobani Sithole uthi langasiphi isikhathi bakhululekile ukumela abantu.

“Sesilungelo ukusebenza simela abantu abangeza befuna ukuya enkundleni, sesilungele njengamagqwetha ukumela wonke umuntu iloba ngubani uma efuna ukuyaphanyeka udaba lombhuqazwe weGukurahundi edale lezomthethwandaba.”

Kunyanga ezimbalwa ezedluleyo uke wahlangana lenkokheli zomdabu uMongameli Emmerson Mnangagwa ngemva kwalokho wabika ukuba inkokheli zomdabu yizo esezizalawula loludaba zisebenzelana lewofisi yakhe kanye lohulumende ukuze lulungisiswe loludaba.

Facebook Forum

XS
SM
MD
LG