amalinks wokungena

Breaking News

Inkomo Sezicuba Njalo eMatabeleland Ngenxa Yokuswelakala Kwamadlelo Lamanzi


Ingcwethi kwezokulima kugatsha lweAgritex zithi sokufe inkomo ezingamakhulu amane lamatshumi ayisitshiyangalombili lasikhombisa 487 lonyaka.

Ingcwethi kwezokulima kugatsha lweAgritex zithi inkomo seziqalile ukucuba endaweni ezitshiyeneyo eZansi yemaNdebeleni ikakhulu eBeitbridge ngenxa yokuswelakala kwamadlelo kanye lamanzi.

UMnu. Zondani Muchemwa ingcwethi kwezokufuywa kwenkomo eZansi yemandebeleni kugatsha lweAgritex utshele umsakazo we Studio 7 ukuthi sekufe inkomo ezingamakhulu amane lamatshumi ayisitshiyangalombili lasikhombisa 487 lonyaka.

UMnu. Muchemwa uthi lanxa isimo singaneno kulanyakenye abafuyi benkomo kumele bethenge isikuba ukuze zingafi njengoba utshani bungakahlumi endaweni ezinengi.

UMnu Gerald Tshakalisa oyisakhamuzi seLutumba eBeitbridge East uyakufakaza ngokufa kwenkomo.

Uphinde wathi kuyadingeka ukuthi uhulumende abambisane lenhlanganiso ezizimeleyo ukuze inkomo zingatshabalali njengalokho okwenzakala nyakenye.

UMnu. Sifanjani Moyo oyisakhamuzi seFulunye eAvoca eInsiza South uthi ukwanda kwabantu ezigabeni lasemapulazini sekudale ukutshabalala kwamadlelo.

Uphinde wathi kuyadingeka ukuthi uhulumende ancedise izakhamizi ngesikuba ngoba silentengo ephezulu.

UMnu. Bartlas Nkala oyisakhamuzi seSilikwe eMatshetsheni eGwanda North uthi emangweni wabo bakhala langemikhaza.

Abogatsha lwezokulima eZansi yemaNdebeleni bathi nyakenye kufe inkomo ezedlula inkulungwane ezingamatshumi amabili lanhlanu 25 758 inengi lazo eBeitbridge ngenxa yokusilela kwamadlelo kanye lamanzi kubangelwa yikungani kuhle kwezulu.

Asizweni umbono kaMnu. Thembinkosi Moyo oyisakhamuzi seMagedleni eGwanda North ngaloludaba.

Izanuse zomumo yomkhathi zithi zikhangelele ukuthi kube lezulu elilingeneyo lonyaka.

please wait
Embed

No media source currently available

0:00 0:04:48 0:00


Facebook Forum

XS
SM
MD
LG