Inkosi yakwaMthwakazi uBulelani Lobhengula Khumalo useyethule uhlelo lwakhe lokwakha kabutsha lokuvuselelwa isizwe sikaMthwakazi esibisela kusibanga abesikuso ngesikhathi kubusa inkosi uMzilikazi.
Amabutho enkosi uLobhengula Bulelani Khumalo abegiya emkhosini wokunanza usuku lwenkosi uMzilikazi oqhutshelwe eJohannesburg ngempelaviki edluleyo.
Kulo umkhosi bekugcwele phamu abebevunule ezesintu, kusinwa kugidwa ezomdabu kukhunjulwa inkosi uMzilikazi eyasungula isizwe sikaMthwakazi.
Inkosi uBulelani Lobhengula isebenzise lolusuku ukuvezela umphakathi uhlelo lwakhe lokuvuselela isizwe sikaMthwakazi.
Uthi loluhlekelo luzaqala ngokubhaliswa kwabo bonke abesizwe sikaMthwakazi abaseSouth Africa lamanye amazwe bese kucina ngabaseZimbabwe.
“Mahlabezulu amahle kunama items la okufuze sikhulumisane ngawo ama action plans for the 2020/202. All iMthwakazian of working age ona 18 must contribute financially towards our wellbeing as a nation, for projects for catering for welfare of uMthwkazi, its people and its leaders. There is apparently a million of us in Mzansi alone by the way.”
Lokhu kuzalandelwa luhlelo lokuqoqwa kwemali yenhlelo zokuthuthukisa isizwe lapho akhuthaze ukuthi umuntu ngamunye akhiphe iR20 loba i$20 ngenyanga.
Limali izasebenza ukuxhasa inhlelo zentuthuko, ezemidlalo, ezamasiko, ezokulima, ezemisebenzi lezamabhizimusi.
Umnumnzana Zwakele Caleb Makhulela odabuka ePlumtree ngomunye wabemukele lesi simemezelo ngezandla zombili, esithi ukwakha lesi sizwe kuzaqala ngokukhumbula inkosi uMzilikazi.
“Kubaluleke kakhulu ukuthi sikhumbule ngoba uma singasakhumbulanga thina sonke isizukulwana sethu labantwabethu abasele amuva kwethu ngekebazi. Kubalukele kakhulu ukuthi sigcine amasiko ethu. Sigcine lesizwe sethu sihlangene inhlangothi zonke eKezi, Lupane, Kwankosikazi lami njengobanje ngithi ngiphuma ePlumtree kwaGampu.”
Leyinto egcizelelwa ngumnumnzana Junior Ngwenya odabuka eKezi eMaphisa yena othi kungabamnandi kakhulu uma isizwe sikaMthwakazi singabuyela empilweni yomdabu.
“UMzilikazi kaMatshobana, uMtungwa, uMbulazi. Ngithike wonke umuntu lapho akhona kufanele ukuthi akhumbule inkosi yakithi. Sizazi imvelaphi yethu singahlali sigwaba ngesingelakho. Azibuye emasisweni sidle ngoludala. Yithi abakoMthwakazi.”
Inkosi uBulelani ukhuthaze bonke abadabuka kwaMthwakazi abasemazweni ukuthi bayethola umhlaba ekhaya njalo babeleqiniso lokuthi balemizi.
Ukhuthaze njalo izinduna ukuthi zingavumi ukuthi imvumo yokwemba amatshe aligugu koMthwakazi ithathwe ngabantu abadabuka kwezinye indawo. Uthi imali evela kula amatshe aligugu kuzafuze isiwe kuntuthuko yesizwe sikaMthwakazi.
Uthi olunye lwenhlelo zakhe yikukhuthaza lokusekela intsha yakwaMthwakazi ukuthi ifunde ithole amakhono emisebenzi ngoba lezi yizinto ezizadingeka kakhulu ekuthuthukiseni isizwe.
Uthi ufuna ukuthi uMthwakazi abuyele kusimo ayekiso n gesikhathi sikaMzilikazi lapho abezimele ngokugcweleyo, ebuswa ngokomdabu njalo elenhlelo eziqinileyo zokuvikela uzulu endlaleni lebuyangeni.
Loba kunjalo bakhona abathi kuzabanzima ukuthi iphupho lenkosi leli lifezeke njangoba uhulumende weZimbabwe engasoke avumele inhlelo zokuqoqa isizwe sikaMthwakazi kabutsha. Abanye bathi okuhluphayo yikuthi bakhona abanye labo abalokhu befuna ubukhosi bukaMzilikazi okuyinto abathi izadala ukudonselana nxa inkosi uBulelani izama ukufeza lelicebo.