Inkulumo kade zisenziwa ukuzama ukukhumisa umlotha uNkosazana Thokozani Khuphe loMnu. Nelson Chamisa zibikwa sezifike komlindi uyacina kungela sisombululo.
Selokhu kwaqala ukudonselana amandla phakathi kwababili laba kulandela ukubhubha kukaMnu. Morgan Tsvangirai ngenyanga ka Nhlolanja bekulemizamo ebisenziwa ngabafundisi bako Bulawayo eyokuvikela ukudabuka phakathi kwebandla le MDC-T.
Kodwa umncedisi kaNkosazana Khuphe, uMnu. Witness Dube utshele uGibbs Dube weStudio Seven ukuthi amanzi asecithekile njalo awasabutheki okutsho ukuthi sekulokwehlukana kukaKhuphe labanye.
“Inkulumo bezikhona kumaviki ambalwa wona la asedlule. Kodwa njengoba umama umaKhuphe ephawulile sobala emhlanganweni. Osekusele yikuthi iparty ilungiselele ukuya ku extra-ordinary congress okuxaxazululwa khona konke,” kutsho uDube.
Wengezelele esithi kutholakale ukuthi inkulumo kade zicitha nje isikhathi kuphela zingaphathisi ngalutho.
Uthi njalo kuzamele abantu be Zimbabwe bakhethe ukuthi basekela ibandla elifana le Zanu PF na kumbe elehlukeneyo elilandela isisekelo sombuso walo.
“Ama talks awasekho ngoba indaba kade zikhulunywa bezizingelezela ndawonye isikhathi sonke lesi yikho umama umaKhuphe esebenzisa amandla awaphiwa ngumhlangano we congress ngomnyaka ka 2014 usebize umhlanango we extra – ordinary congress,” kutsho uDube.
